Vita huko Emao

¹Gorgia akatwaa askari elfu tano na wapanda farasi wateule elfu moja, jeshi lake likaondoka usiku

²ili kulishambulia jeshi la Wayahudi na kuwapiga ghafla. Watu wa ngomeni walikuwa viongozi wake.

³Yuda akapata habari, akaondoka, yeye na watu wake hodari, ili alipige jeshi la mfalme lililokuwapo Emao,

⁴wakati vikosi vingine vimetawanyika.

⁵Gorgia akaingia katika kambi ya Yuda usiku, asione mtu. Akaenda kuwatafuta milimani, akisema. Watu hawa wanatukimbia.

⁶Hata kulipopambazuka, Yuda alitokea uwandani na watu elfu tatu, ingawa hawakuwa na silaha na panga kama walivyotaka.

⁷Wakaiona kambi ya mataifa imara, yenye maboma ya nguvu, na wapanda farasi hodari sana kwa vita wameizunguka.

⁸Yuda akawaambia wafuasi wake, Msiogope wingi wao, wala msihofu mashambulio yao.

⁹Kumbukeni jinsi baba zetu walivyookolewa katika Bahari ya Shamu, Farao alipowafuatia na jeshi kubwa.

¹⁰Basi, tuzililie mbingu, tuone kama Yeye ataturehemu na kulikumbuka agano lake na baba zetu na kuliharibu jeshi hili usoni petu leo;

¹¹hivyo mataifa yote watajua ya kuwa yupo mmoja anayemkomboa Israeli na kumwokoa.

¹²Wageni wakainua macho yao wakawaona wanawajia,

¹³wakatoka kambini kupigana. Nao waliokuwa na Yuda wakapiga tarumbeta,

¹⁴na kujitia vitani, mataifa wakashindwa kabisa, wakakimbia uwandani,

¹⁵hata wale waliokuwa nyuma wakauawa kwa upanga. Wakafuatia hata Gazara na nyanda za Idumia za Azota na Yamnia, wakaanguka watu wapatao elfu tatu.

¹⁶Yuda na kikosi chake waliporudi baada ya kuwafuatia

¹⁷aliwaambia watu wake, Msifanye pupa ya mateka, maana kuna mapigano mbele yetu.

¹⁸Gorgia na watu wake wako karibu nasi milimani. Basi simameni sasa kupambana na adui na kupigana nao, baadaye tekeni nyara bila hofu.

¹⁹Yuda hakudiriki kumaliza maneno yake ila kikosi chao kilionekana wakivizia toka milimani.

²⁰Wakaona jeshi lao limekimbiwa na kambi imeteketezwa, maana moshi uliopanda juu uliwafahamisha yaliyotendeka.

²¹Nao walipoona hayo waliogopa sana, hata walipoliona jeshi la Yuda uwandani, limepangwa tayari kwa vita,

²²walikimbia wote kwenye nchi ya Wafilisti.

²³Basi, Yuda alirudi kuiteka kambi, wakapata dhahabu nyingi na fedha, na nguo za samawi na urujuani, na mali nyingi.

²⁴Wakarudi kwao wakiimba wimbo na kuzitolea mbingu shukrani “kwa kuwa yu mwema, kwa maana fadhili zake ni za milele.”

²⁵Israeli alipata wokovu mkuu siku ile.

Juhudi za kwanza za Lisia

²⁶Wale wageni waliookoka walimwendea Lisia wakamsimulia yote yaliyotokea,

²⁷naye alipoyasikia alifadhaika na kuvunjika moyo, kwa kuwa yale aliyoyataka watendewe Waisraeli hayakutendeka, wala mambo aliyoamriwa na mfalme hayakutimizwa.

²⁸Basi, katika mwaka uliofuata, alikusanya askari wateule elfu sitini na wapanda farasi elfu tano kupigana nao.

²⁹Wakaja Idumia, wakapiga kambi Bethsura. Yuda akaenda kukutana nao na watu elfu kumi.

³⁰Akaiona nguvu ya jeshi lao, akasali, akisema: Umehimidiwa, Ee Mwokozi wa Israeli: Uliyeyazuia mashambulio ya yule shujaa kwa mikono wa mtumishi wako Daudi; ukalitia jeshi la Wafilisti katika mkono ya Yonathani, mwana wa Sauli, na ya mchukua silaha zake.[#1 Sam 17:41-54; 14:1-23]

³¹Ulifunge jeshi hili vile vile katika mikono ya watu wako Israeli, hata adui zetu walionee haya jeshi lao na wapanda farasi wao.

³²Uwatie woga na kuuyeyusha ujasiri wa nguvu zao; wayatetemekee maangamizo yao.

³³Uwaangushe kwa upanga wa wale wakupendao, na wote walijuao jina lako wakusifu kwa nyimbo.

³⁴Vita vikaanza; wakaanguka wa jeshi la Lisia watu wapatao elfu tano, wakakimbia mbele yao.

³⁵Lisia alipoona wanavyozidi kushindwa, na ujasiri wa Yuda na watu wake unavyozidi, na jinsi walivyokuwa tayari kuishi au kufa kwa ushujaa, aliondoka akaenda Antiokia. Huko akaajiri askari wa mshahara, ili afike tena Uyahudi na jeshi kubwa zaidi.

Kutakasa na kuweka wakfu hekalu

³⁶Yuda na ndugu zake wakasema, Sasa adui zetu wamevunjwa nguvu, basi tupande tukapatakase mahali patakatifu na kupatabaruku.

³⁷Jeshi lote likakusanyika likapanda juu ya mlima Sayuni.

³⁸Wakapaona patakatifu pameachwa ukiwa, na madhabahu yake imetiwa unajisi; milango imechomwa moto, na majani yanaota katika nyua zake kama katika msitu au juu ya mlima, na vyumba vya makuhani vimebomolewa.

³⁹Wakazirarua nguo zao na kulia sana, wakajitia majivu kichwani na kuanguka kifudifudi.

⁴⁰Wakazipiga tarumbeta za kanuni na kuzililia mbingu.

⁴¹Yuda akaweka watu fulani kupigana na wale wa ngomeni, hata atakapokwisha kupatakasa patakatifu,

⁴²Akachagua makuhani wasio na waa, ambao furaha yao ilikuwa katika sheria,

⁴³wakapasafisha patakatifu wakiyatoa mawe yenye unajisi na kuyapeleka nje katika mahali pachafu.

⁴⁴Wakafanya shauri juu ya madhabahu ya sadaka za kuteketezwa ambayo ilikuwa imetiwa unajisi.

⁴⁵Wakapata shauri la kufaa, yaani kuibomoa, isije ikawa lawama kwao kwa kuwa imetiwa unajisi na mataifa. Basi, waliibomoa madhabahu,

⁴⁶wakayaweka mawe yake mahali pa kufaa katika mlima wa hekalu hata atakapokuja nabii wa kuyakatia shauri.

⁴⁷Wakatwaa mawe yasiyochongwa, kama ilivyoamriwa katika sheria, wakafanya madhabahu mpya, mfano wa ile ya kwanza.[#Kut 20:25; Kum 27:5-6]

⁴⁸Wakapajenga patakatifu, na sehemu za ndani za nyumba, na kuzitakasa nyua zake.

⁴⁹Wakafanya vyombo vitakatifu vipya; wakatia kinara, na madhabahu ya kufukizia uvumba, na meza katika hekalu.

⁵⁰Wakafukiza uvumba juu ya madhabahu, wakaziwasha taa za kinara ili ziangaze hekaluni.

⁵¹Wakaweka mikate mezani, na kutungika mapazia, wakazimaliza kazi zote walizoziazimia.

⁵²Wakaondoka mapema siku ya ishirini na tano ya mwezi wa tisa, yaani Kislevu, mwaka mia moja arubaini na nane,[#1 Mak 1:54]

⁵³wakatoa dhabihu, kama ilivyoamriwa katika sheria, juu ya madhabahu mpya ya sadaka za kuteketezwa waliyokuwa wameifanya.

⁵⁴Wakati ule ule na siku ile ile iliyotiwa unajisi na mataifa, siku ile iliwekwa wakfu tena kwa nyimbo na vinubi na vinanda na matari.

⁵⁵Watu wote wakaanguka kifudifudi wakipaza sifa kwa mbingu, kwake aliyewapa ufanisi.

⁵⁶Wakaiadhimisha sikukuu ya kuitabaruku madhabahu muda wa siku nane, wakileta sadaka za kuteketezwa kwa furaha na kutoa dhabihu ya wokovu na shukrani.

⁵⁷Pia, waliupamba ukuta wa mbele wa hekalu kwa taji za dhahabu na vigao; wakaweka wakfu malango na vyumba vya makuhani na kuvitia milango.

⁵⁸Kulikuwa na furaha kubwa kwa watu, na aibu iliyoletwa na mataifa iliondolewa.

⁵⁹Yuda na ndugu zake, na jamii yote ya Israeli, walikata shauri ya kuwa siku za kuitabaruku madhabahu ziadhimishwe kwa furaha na shangwe kila mwaka kwa wakati wake, muda wa siku nane tangu siku ya ishirini na tano ya mwezi Kislevu.

⁶⁰Wakati huo walijenga kuta ndefu na minara imara kuuzunguka mlima Sayuni, ili mataifa wasije tena wakawakanyaga kama walivyofanya zamani.

⁶¹Akaweka kikosi humo kuulinda. Wakaimarisha Bethsura pia, ili watu wawe na ngome kuelekea Idumia.