Hekalu kutakaswa

¹Huko nyuma Makabayo na wafuasi wake, wakiongozwa na BWANA, walilitwaa hekalu tena, na mji pia.

²Wakazibomoa madhabahu zilizojengwa na wageni sokoni, na kuviharibu viwanja vya miungu yao.

³Wakiisha kulitakasa hekalu walijenga madhabahu mpya ya kutolea dhabihu, wakapata moto kwa kugonganisha mawe, wakatoa dhabihu, ambazo hazikutolewa kwa muda wa miaka miwili. Wakafukiza uvumba na kuwasha taa na kuweka mikate ya wonyesho.

⁴Baada ya kufanya hayo walianguka kifudifudi wakamwomba BWANA wasipatwe tena na mambo mabaya kama hayo; bali, wakianguka tena katika dhambi, awarudi kwa kiasi, asiwatie tena katika mikono ya washenzi wakufuru.

⁵Ikatokea ya kuwa, siku ile hekalu lilipotiwa unajisi na wageni, siku ile ile lilitakaswa; yaani, siku ya ishirini na tano ya mwezi ule, ndio Kislevu.

⁶Waliiadhimisha kwa siku nane kwa mashangilio kama maadhimisho ya sikukuu ya vibanda, wakikumbuka ya kuwa, si zamani sana, wakati wa sikukuu ya vibanda walikuwa wakizungukazunguka milimani na pangoni kama wanyama.

⁷Ndiyo sababu walichukua fimbo zilizopambwa majani, na matawi, na majani ya mitende, wakapaza nyimbo za shukrani kwake Yeye aliyewafanikisha na kuwawezesha kupatakasa mahali pake mwenyewe.

⁸Wakaagiza pia, kwa shauri la watu wote, iwekwe sheria kwamba taifa lote la Wayahudi waziadhimishe siku hizo kila mwaka.

6. VITA VYA YUDA MAKABAYO NA MATAIFA JIRANI NA LISIA WAZIRI WA EUPATORI

Fedheha ya Tolemayo Makroni

⁹Basi, hizi ni habari za mwisho za Antioko aliyeitwa Epifani.

Kutawazwa kwa Antioko Eupatori

¹⁰Sasa tutaeleza yaliyotokea wakati wa Antioko Eupatori, mwana wa yule mwovu, tukitaja kwa ufupi maafa makuu ya vita vyake.[#1 Mak 6:17]

¹¹Mtu huyu, alipourithi ufalme, alimweka Lisia kuwa waziri wake na jemadari mkuu wa Koele-Shamu na Foinike.

¹²Ikawa Tolemayo, aliyeitwa Makroni, alikuwa akionesha mfano mwema wa kuwatendea Wayahudi kwa haki – kwa sababu ya mambo mengi yasiyo haki waliyokuwa wametendwa – akijaribu kuchukuana nao kwa amani.

¹³Kwa sababu hiyo alishtakiwa na rafiki za mfalme mbele ya Eupatori; tena, kila upande alisikia watu wakimwita “msaliti” kwa sababu aliacha kisiwa cha Kipro, alichokabidhiwa na Filometo, na kumfuata Antioko Epifani. Basi kwa jinsi alivyofedheheka alikula sumu akajiua.

Shughuli za vita katika Idumaya

¹⁴Gorgia alipofanywa kiongozi wa nchi ile alijipatia jeshi la askari wageni wa mshahara akapigana na Wayahudi kila mara.

¹⁵Pamoja na hayo, Waidumaya, walioshika ngome kadha wa kadha imara sana, waliwasumbua Wayahudi, wakiongeza uadui kwa kuwapokea watu waliowakimbilia kutoka Yerusalemu.

¹⁶Lakini Makabayo na watu wake, wakiisha kuomba dua na kumsihi Mungu ajiweke upande wao, walizishambulia ngome za Waidumaya kwa nguvu, wakazitwaa.

¹⁷Walirudisha nyuma askari waliopigana ukutani, wakaua wote waliokutana nao, wakiangamiza watu wasiopungua elfu ishirini.

¹⁸Wengine, wasiopungua elfu tisa, waliikimbilia minara miwili, imara sana, iliyokuwa na vitu vyote viwezavyo kuhitajiwa wakati wa kuhusuriwa.

¹⁹Basi, Makabayo aliwaacha Simoni na Yusufu, pamoja na Zakayo na kikosi chake, watu wa kutosha kwa mazingio, naye mwenyewe alikwenda kule alikotakiwa zaidi.

²⁰Lakini watu wengine wa Simoni, waliokuwa na choyo, walikubali kupewa rushwa na wale wa ndani ya minara, hata, wakiisha kupewa drakma elfu sabini, waliacha wengine watoke kwa siri.

²¹Habari hizo zilipomfikia Makabayo, aliwakusanya wakuu wa watu, akawashtaki ya kuwa wamewauza ndugu zao kwa fedha kwa kuwaweka adui zao huru kupigana nao.

²²Akawaua wale wasaliti, akaishambulia minara akaitwaa.

²³Katika kazi zote za vita alifaulu; na katika ngome hizi mbili watu waliowaua walikuwa zaidi ya elfu ishirini.

Yuda amshinda Timotheo

²⁴Ndipo Timotheo, ambaye alishindwa kwanza na Wayahudi, alikusanya jeshi kubwa la askari wageni, na kikosi kikubwa kidogo cha askari wapanda farasi wa Asia. Akaja kana kwamba anataka kushambulia Uyahudi kwa nguvu.

²⁵Alipokaribia, Makabayo na watu wake walijitia vumbi kichwani na kujivika gunia kiunoni,

²⁶wakimwomba Mungu. Wakaanguka juu ya daraja mbele ya madhabahu, wakamsihi awafadhili, awe adui kwa adui zao na mtesi kwa watesi wao, kama sheria isemavyo waziwazi.

²⁷Kisha wakaondoka katika kusali, wakatwaa silaha zao, wakatoka mjini wakaenda mbele, mwendo mrefu kidogo; hata walipofika karibu na adui walisimama.

²⁸Kulipokucha asubuhi, yale majeshi mawili yalianza kupigana. Hawa wengine walikuwa na tumaini la kufanikiwa na kushinda kwa sababu pamoja na ujasiri wao wenyewe, walimtegemea BWANA waliyemkimbilia; hali wengine walisukumizwa vitani na ukakamavu wao tu.

²⁹Vita vilipokuwa vikali zaidi, adui wakaona watu watano watukufu wakitoka mbinguni juu ya farasi wenye matandiko ya dhahabu na kutangulia mbele ya Wayahudi.

³⁰Nao walimzunguka Makabayo na kumfunika kwa ngao zao na kumlinda asitiwe jeraha, na huku walikuwa wakiwatupia adui mishale na radi hata walipofushwa macho, wakaingia wasiwasi na fadhaa, wakakatwa vipande vipande.

³¹Wakauawa watu elfu ishirini na tano na mia tano, pamoja na wapanda farasi mia sita.

³²Timotheo mwenyewe aliikimbilia ngome iitwayo Gaza, ngome imara sana chini ya amri ya Kaerea.

³³Askari wa Makabayo wakaizingira ngome muda wa siku ishirini na nne kwa moyo wa furaha.

³⁴Wale wa ndani, wakiitumainia nguvu ya ngome, waliwalaumu vibaya sana kwa matukano na makufuru.

³⁵Lakini siku ya ishirini na tano alfajiri, vijana ishirini wa jeshi la Makabayo, wakitiwa uchungu sana kwa yale makufuru, waliushambulia ukuta kwa ujasiri, na katika ghadhabu yao walimpiga kwa upanga kila waliyemkuta.

³⁶Wengine wakawafuata, wakiwazunguka adui kwa nyuma, wakaitia minara moto wakawateketeza wakufuru wangali hai. Wengine wakaivunja milango wakaingiza askari waliobaki. Hivyo waliutwaa mji.

³⁷Wakamwua Timotheo, aliyekuwa amejificha katika tangi, pamoja na nduguye Kaerea, na Apolofani.

³⁸Wakiisha fanya hayo yote, waliimba nyimbo za shukrani, wakimhimidi BWANA kwa fadhili zake nyingi kwa Waisraeli na kwa kuwapa ushindi.