¹Haya ndiyo asemayo BWANA; Kwa makosa matatu ya Moabu, naam, kwa manne, sitaizuia adhabu yake isimpate; kwa sababu aliichoma moto mifupa ya mfalme wa Edomu hata ikawa chokaa; Sef 2:8-11; 2 Fal 3:27[#Isa 15:1—16:14; 25:10-12; Yer 48:1-47; Eze 25:8-11]

²lakini nitatuma moto juu ya Moabu, nao utayateketeza majumba ya Keriothi; na Moabu atakufa pamoja na mshindo, na kelele, na sauti ya tarumbeta;[#Yer 48:41]

³nami nitamkatilia mbali mwamuzi atoke kati yake, nami nitawaua wakuu wake pamoja naye, asema BWANA.[#Hes 24:17; Yer 48:7]

Hukumu kwa Yuda

⁴Haya ndiyo asemayo BWANA; Kwa makosa matatu ya Yuda, naam, kwa manne, sitaizuia adhabu yake isimpate; kwa sababu wameikataa sheria ya BWANA; wala hawakuzishika amri zake; na maneno yao ya uongo yamewakosesha, ambayo baba zao waliyafuata;[#Law 26:14; 2 Sam 12:9,10; 2 Nya 36:14-17; Neh 1:7; Isa 5:24; 28:15; Eze 20:13,16; Dan 9:11; Yer 16:19]

⁵lakini nitatuma moto juu ya Yuda, nao utayateketeza majumba ya Yerusalemu. Hukumu kwa Israeli.[#Hos 8:14]

⁶Haya ndiyo asemayo BWANA; Kwa makosa matatu ya Israeli, naam, kwa manne, sitaizuia adhabu yake isimpate; kwa sababu wamewauza wenye haki kwa fedha, na maskini kwa jozi ya viatu;[#Isa 29:21; Amo 5:11,12]

⁷nao hukanyaga vichwa vya maskini katika mavumbi ya nchi na kuwasukuma walioteseka kutoka kwa njia yao; na mtu na baba yake wanamwendea mwanamke mmoja, na kulitia unajisi jina langu takatifu;[#Isa 10:2; Eze 22:11; Law 20:3; Eze 36:20; Rum 2:24]

⁸nao hujilaza karibu na kila madhabahu juu ya nguo zilizowekwa rehani, na katika nyumba ya Mungu wao hunywa divai ya watu waliotozwa fedha.[#Kut 22:26; 1 Kor 10:21]

⁹Lakini nilimwangamiza Mwamori mbele yao, ambaye urefu wake ulikuwa kama urefu wa mierezi, tena alikuwa na nguvu kama mialoni; lakini niliyaangamiza matunda yake toka juu, na mizizi yake toka chini.[#Hes 21:24; Kum 3:8-11]

¹⁰Pia niliwapandisha ninyi kutoka nchi ya Misri, nikawaongoza muda wa miaka arubaini jangwani, ili mpate kuimiliki nchi ya Mwamori.

¹¹Nami nikawainua watu miongoni mwa wana wenu wawe manabii, na katika vijana wenu wawe Wanadhiri; je! Sivyo hivyo, enyi wana wa Israeli? Asema BWANA.[#Amu 13:5; Hes 6:1-8]

¹²Lakini mliwapa Wanadhiri mvinyo wanywe; mkawaamuru manabii, mkisema, Msifanye unabii.[#Isa 30:10; Mdo 4:18]

¹³Tazameni, nitawalemea ninyi,

Kama gari lilemeavyo lililojaa miganda.

¹⁴Naye apigaye mbio atapotewa na kimbilio;

Wala aliye hodari hataongeza nguvu zake;

Wala shujaa hatajiokoa nafsi yake;

¹⁵Wala apindaye upinde hatasimama;

Wala aliye mwepesi wa miguu hataokoka;

Wala apandaye farasi hatajiokoa nafsi yake;

¹⁶Naye mwenye moyo mkuu miongoni mwa mashujaa

Atakimbia uchi siku ile, asema BWANA.