Mwaliko wa maisha mema

¹Haya, kila aonaye kiu, njoni majini,[#Yn 4:14; 7:37; 1 Kor 1:22; Mt 13:44; Ufu 21:6; 3:18; 22:17]

Naye asiye na fedha; njoni, nunueni mle;

Naam, njoni, nunueni divai na maziwa,

Bila fedha na bila gharama.

²Kwa nini mtoe fedha kwa ajili ya kitu ambacho si chakula?

Na mapato yenu kwa kitu kisichoshibisha?

Nisikilizeni kwa bidii, mle kilicho chema,

Na kujifurahisha nafsi zenu kwa unono.

³Tegeni masikio yenu, na kunijia;[#Mt 11:28; Isa 54:8; 2 Sam 7:8; Zab 89:28; Mdo 13:34]

Sikieni, na nafsi zenu zitaishi;

Nami nitafanya nanyi agano la milele,

Naam, rehema za Daudi zilizo imara.

⁴Angalieni, nimemweka kuwa shahidi kwa makabila ya watu; kuwa kiongozi na jemadari kwa makabila ya watu.[#Mal 3:5; 1 Tim 6:13; Ufu 1:5; Eze 34:23; Dan 9:25; Ebr 2:10]

⁵Tazama, utaita taifa usilolijua, na taifa lisilokujua wewe litakukimbilia, kwa sababu ya BWANA, Mungu wako, na kwa ajili yake Mtakatifu wa Israeli; maana amekutukuza.[#Isa 52:15; Efe 2:11,12; Mdo 3:13]

⁶Mtafuteni BWANA, maadamu anapatikana,[#Zab 32:6; Amo 5:4,14; Mt 5:25; Yn 7:34; 2 Kor 6:2; Ebr 3:13]

Mwiteni, maadamu yuko karibu;

⁷Mtu mbaya na aache njia yake,[#Zek 8:17; Yer 3:12]

Na mtu asiye haki aache mawazo yake;

Na amrudie BWANA,

Naye atamrehemu;

Na arejee kwa Mungu wetu,

Naye atamsamehe kabisa.

⁸Maana mawazo yangu si mawazo yenu, wala njia zenu si njia zangu; asema BWANA.

⁹Kwa maana kama vile mbingu zilivyo juu sana kuliko nchi, ndivyo njia zangu zilivyo juu sana kuliko njia zenu, na mawazo yangu kuliko mawazo yenu.

¹⁰Maana kama vile mvua ishukavyo, na theluji, kutoka mbinguni, wala hairudi huko; bali huinywesha ardhi, na kuizalisha na kuichipuza, ikampa mtu apandaye mbegu, na mtu alaye chakula;[#2 Kor 9:10]

¹¹ndivyo litakavyokuwa neno langu, litokalo katika kinywa changu; halitanirudia bure, bali litatimiza mapenzi yangu, nalo litafanikiwa katika mambo yale niliyolituma.

¹²Maana mtatoka kwa furaha,

Mtaongozwa kwa amani;

Mbele yenu milima na vilima vitatoa nyimbo;

Na miti yote ya shambani itapiga makofi.

¹³Badala ya michongoma utamea msonobari,

Na badala ya mibigili, mhadesi;

Jambo hili litakuwa la kumpatia BWANA jina,

Litakuwa ishara ya milele isiyokatiliwa mbali.