Ibada na maadili ya utakatifu

¹BWANA akanena na Musa, akamwambia,

²Nena na mkutano wote wa wana wa Israeli, uwaambie, Mtakuwa watakatifu; kwa kuwa mimi BWANA, Mungu wenu, ni mtakatifu.[#Law 11:44-45; 20:7,26; 1 Pet 1:16; Kut 19:6; Efe 1:4; 1 The 4:7]

³Kila mtu na amche mama yake, na baba yake, nanyi mtazitunza Sabato zangu; mimi ndimi BWANA, Mungu wenu.[#Kut 20:8,12; 31:13; Kum 5:12,16; Mwa 2:2; Neh 9:14; 13:15-21; Isa 56:2; 58:13; Mk 2:27; Ebr 4:9]

⁴Msigeuke kufuata sanamu, wala msijitengenezee miungu ya kusubu mimi ndimi BWANA, Mungu wenu.[#Law 26:1; Kut 20:3-5,23; 34:17; Kum 27:15; 1 Kor 10:14]

⁵Nanyi hapo mtakapomchinjia BWANA sadaka ya amani mtaitoa kwa njia ipasayo ili mpate kukubaliwa.

⁶Italiwa siku iyo hiyo mliyoichinja, na siku ya pili yake; na kama kitu chochote katika sadaka hiyo kilisalia hata siku ya tatu kitachomwa moto.

⁷Ikiwa sadaka hiyo inaliwa hata kidogo siku ya tatu ni machukizo; haitakubaliwa;

⁸lakini kila mtu atakayekula atalipizwa uovu wake mwenyewe, kwa sababu amekinajisi kitu hicho kitakatifu cha BWANA; na mtu huyo atatengwa na watu wake.

⁹Na mtakapovuna mavuno ya nchi yenu, usivune kabisa katika pembe za shamba lako, wala usiyakusanye masazo ya mavuno yako;[#Law 23:22; Kum 15:1-18; 24:19-22; Kut 23:11; Rut 2:15]

¹⁰wala usiyakusanye masazo ya mizabibu yako, wala usiyaokote matunda ya mizabibu yako yaliyopukutika; uyaache kwa ajili ya maskini na mgeni; mimi ndimi BWANA, Mungu wenu.[#Zab 41:1; 140:12; Mit 14:31; 22:16; Mhu 5:8; Isa 3:12-15; Yak 2:1-9]

¹¹Msiibe, wala msidanganye, wala msiambiane uongo.[#Kut 20:15,16; Kum 5:19,20; 1 Fal 13:18; Yer 9:3-5; Mdo 5:3,4; Efe 4:25]

¹²Msiape uongo kwa jina langu, na ukalinajisi jina la Mungu wako; Mimi ndimi BWANA.[#Kut 20:7; Kum 5:11; Mt 5:33]

¹³Usimdhulumu jirani yako, wala kumnyang'anya mali yake; ujira wake aliyeajiriwa usikae kwako usiku kucha hadi asubuhi.[#Kum 24:14-15; Mal 3:5; Yak 5:4]

¹⁴Usimlaani kiziwi, wala usitie kwazo mbele ya kipofu, bali umche Mungu wako; Mimi ndimi BWANA.[#Kum 27:18; Rum 14:13; 1 Pet 2:17]

¹⁵Msitende yasiyo haki katika hukumu, usimpendelee mtu maskini, wala kumstahi mwenye nguvu; bali utamhukumu jirani yako kwa haki.[#Kut 23:6-8; Kum 16:19; Zab 82:2; Mit 24:23; Yak 2:9]

¹⁶Usiende huku na huko katikati ya watu wako, kama mchongezi; wala usijifaidi kwa damu ya jirani yako; mimi ndimi BWANA.[#1 Fal 21:13; Mt 26:60; #19:16 Katika Kiebrania ni ‘kuwa kinyume cha damu’.]

¹⁷Usimchukie ndugu yako moyoni mwako; ni lazima kumkemea jirani yako, au ulipizwe uovu kwa ajili yake[#Mt 18:15; Mwa 27:41; 1 Yoh 2:9,11; 3:15; Lk 17:3]

¹⁸Usifanye kisasi, wala kuwa na kinyongo juu ya wana wa watu wako; bali umpende jirani yako kama nafsi yako; Mimi ndimi BWANA.[#Mt 5:43,44; 19:19; 22:39; Mk 12:31; Lk 10:27; Rum 13:9; 12:17; Gal 5:4; Yak 2:8]

¹⁹Mtazishika amri zangu. Usiwaache wanyama wako wa mfugo wakazaana kwa namna mbalimbali; usipande shamba lako mbegu za namna mbili pamoja; wala usivae mwilini mwako nguo ya namna mbili zilizochanganywa pamoja.[#Kum 22:9-11]

²⁰Tena mtu yeyote alalaye na mwanamke aliye mjakazi, naye ameposwa na mwanamume mwingine, wala hakukombolewa kwa lolote, wala hakupewa uhuru wake; watachunguzwa; hawatauawa, kwa sababu huyo mwanamke hakuwa huru.

²¹Na huyo mwanamume ataleta sadaka yake ya hatia aitoe kwa BWANA, hata mlangoni pa hema ya kukutania; kondoo dume kwa hiyo sadaka ya hatia.

²²Kisha huyo kuhani atafanya upatanisho kwa ajili yake, kwa huyo kondoo dume wa sadaka ya hatia mbele za BWANA, kwa ajili ya dhambi yake aliyoifanya; naye atasamehewa hiyo dhambi yake aliyoifanya.

²³Nanyi mtakapoingia katika nchi ile, na kupanda miti ya namna zote kwa ajili ya chakula, ndipo mtayahesabu matunda yake kama yaliyotakazwa; kwa muda wa miaka mitatu miti hiyo itakuwa kwenu kama katazo; matunda yake hayataliwa.[#19:23 Katika Kiebrania ni ‘kama kutotahiriwa kwao’.]

²⁴Lakini mwaka wa nne matunda yake yote yatakuwa ni matakatifu, kwa ajili ya kumpa BWANA shukrani.[#Kum 12:17,18]

²⁵Na katika mwaka wa tano mtakula matunda yake, ili ipate kuwapa mavuno yake; mimi ndimi BWANA, Mungu wenu.

²⁶Msile kitu chochote pamoja na damu yake; wala msifanye kuloga, wala kutumia utambuzi.[#Mwa 9:4; Law 7:26-27; 17:10-14; Kum 12:16,23; 15:23; 18:10; 2 Fal 17:17]

²⁷Msinyoe denge pembe za vichwani, wala msiharibu pembe za ndevu zenu.[#Law 21:5; Kum 14:1; Yer 9:26]

²⁸Msichanje chale yoyote katika nyama ya miili yenu kwa ajili ya wafu, wala msiandike alama miilini mwenu; mimi ndimi BWANA.[#Kum 14:1]

²⁹Usimnajisi binti yako, ili kumfanya awe kahaba; isiwe hiyo nchi kuuandama ukahaba, na nchi kujawa na uovu mkuu.[#Kum 23:17]

³⁰Zishikeni Sabato zangu, mpaheshimu patakatifu pangu; mimi ndimi BWANA.[#Law 26:2; Mhu 5:1]

³¹Msiwaendee wenye pepo, wala wachawi; msiwatafute; ili kutiwa unajisi na wao; Mimi ndimi BWANA, Mungu wenu.[#Kum 18:11; 1 Sam 28:3; 2 Fal 23:4; Isa 8:19]

³²Mwondokeeni mtu mwenye mvi; heshimuni uso wa mtu mzee; nawe mche Mungu wako, Mimi ndimi BWANA.[#1 Fal 2:19; Mit 20:29; 23:22; 1 Tim 5:1]

³³Na mgeni akikaa pamoja nawe katika nchi yako, usimdhulumu.[#Kut 22:21; Kum 24:17-18; 27:19]

³⁴Mgeni aishiye pamoja nawe atakuwa kama mzaliwa kwenu; mpende kama nafsi yako; kwa maana ninyi mlikuwa wageni katika nchi ya Misri; Mimi ndimi BWANA, Mungu wenu.[#Kut 12:48; Kum 10:19]

³⁵Msifanye yasiyo haki katika hukumu, wala katika kupima, wala katika mizani, wala katika cheo.[#Kum 25:13-16; Mit 20:10; Eze 45:10]

³⁶Mizani ya haki, vipimo vya haki, efa ya haki, hini ya haki, ndivyo mtakavyokuwa navyo. Mimi ndimi BWANA, Mungu wenu, niliyewatoa katika nchi ya Misri.[#Kum 25:13,15; Mit 20:10]

³⁷Zishikeni sheria zangu, na hukumu zangu, na kuzitenda. Mimi ndimi BWANA.[#Kum 6:25; 5:1; Law 18:4,5]