¹Kwa kuwa watu wengi wameweza kuandika kwa utaratibu habari za mambo yaliyotimizwa katikati yetu,

²kama walivyotuhadithia wale waliokuwa mashahidi wenye kuyaona, na watumishi wa lile neno tokea mwanzo,[#Yn 15:27]

³nimeona vema mimi nami, kwa kuwa nimejitafutia usahihi wa mambo hayo yote tangu mwanzo, kukuandikia kwa taratibu, Theofilo mtukufu,[#Mdo 1:1]

⁴upate kujua hakika ya mambo yale uliyofundishwa.

Kuzaliwa kwa Yohana Mbatizaji kwatabiriwa

⁵Zamani za Herode, mfalme wa Yudea, palikuwa na kuhani mmoja, jina lake Zakaria, wa kikundi cha ukuhani cha Abiya, na mkewe alikuwa mmojawapo wa uzao wa Haruni, jina lake Elisabeti.[#1 Nya 24:10]

⁶Na wote wawili walikuwa wenye haki mbele za Mungu, wakiishi katika amri zote za Bwana na maagizo yake bila lawama.

⁷Nao walikuwa hawana mtoto, maana Elisabeti alikuwa tasa, na wote wawili ni wazee sana.

⁸Basi ikawa, alipokuwa akifanya kazi ya ukuhani wakati wa zamu yake mbele za Mungu,

⁹kama ilivyokuwa desturi ya ukuhani, kura ilimwangukia kuingia katika hekalu la Bwana ili kufukiza uvumba.[#Kut 30:7]

¹⁰Na makutano yote ya watu walikuwa wakisali nje saa ya kufukiza uvumba.

¹¹Akatokewa na malaika wa Bwana, amesimama upande wa kulia wa madhabahu ya kufukizia.

¹²Zakaria alipomwona alifadhaika, hofu ikamwingia.

¹³Lakini yule malaika akamwambia, Usiogope, Zakaria, maana dua yako imesikiwa, na mkeo Elisabeti atakuzalia mtoto wa kiume, na jina lake utamwita Yohana.

¹⁴Nawe utakuwa na furaha na shangwe, na watu wengi watakufurahia kuzaliwa kwake.

¹⁵Kwa sababu atakuwa mkuu mbele za Bwana; hatakunywa divai wala kileo; naye atajazwa Roho Mtakatifu hata tangu tumboni mwa mamaye.[#Hes 6:3; Amu 13:4,5; 1 Sam 1:11]

¹⁶Na wengi katika Waisraeli atawarejesha kwa Bwana Mungu wao.

¹⁷Naye atatangulia mbele zake katika roho ya Eliya, na nguvu zake, ili kuigeuza mioyo ya baba iwaelekee watoto, na kuwatilia waasi akili za wenye haki, na kumwekea Bwana tayari watu waliotayarishwa.[#Mal 3:1; 4:5-6; Mt 17:11-13]

¹⁸Zakaria akamwambia malaika, Nitajuaje neno hilo? Maana mimi ni mzee, na mke wangu ni mkongwe wa siku nyingi.[#Mwa 18:11]

¹⁹Malaika akamjibu akamwambia, Mimi ni Gabrieli, nisimamaye mbele za Mungu; nami nimetumwa niseme nawe, na kukupasha habari hizi njema.[#Dan 8:16; 9:21; Ebr 1:14]

²⁰Na tazama! Utakuwa bubu, usiweze kusema, mpaka siku ile yatakapotukia hayo, kwa sababu hukuyasadiki maneno yangu; nayo yatatimizwa kwa wakati wake.[#Lk 1:45]

²¹Na wale watu walikuwa wakimngojea Zakaria, wakastaajabia kukawia kwake mle hekaluni.

²²Alipotoka akiwa hawezi kusema nao, walitambua ya kuwa ameona maono ndani ya hekalu, naye aliendelea kuwaashiria akakaa bubu.

²³Ikawa siku za huduma yake zilipokuwa zimetimia akaenda nyumbani kwake.

²⁴Hata baada ya siku zile mkewe Elisabeti alichukua mimba akatawa miezi mitano, akisema,

²⁵Hivi ndivyo alivyonitendea Bwana katika siku zile alizoniangalia ili kuniondolea aibu yangu mbele ya watu.[#Mwa 30:23]

Kuzaliwa kwa Yesu kwatabiriwa

²⁶Mwezi wa sita, malaika Gabrieli alitumwa na Mungu kwenda mpaka katika mji wa Galilaya, jina lake Nazareti,

²⁷kwa mwanamwali bikira aliyekuwa ameposwa na mtu, jina lake Yusufu, wa ukoo wa Daudi; na jina lake bikira huyo ni Mariamu.[#Mt 1:16,18; Lk 2:5]

²⁸Akaingia nyumbani kwake akasema, Salamu, uliyepewa neema, Bwana yu pamoja nawe.[#Amu 5:24]

²⁹Naye akafadhaika sana kwa ajili ya maneno yake, akawaza moyoni, Salamu hii ni ya namna gani?

³⁰Malaika akamwambia, Usiogope, Mariamu, kwa maana umepata neema kwa Mungu.

³¹Tazama, utachukua mimba na kuzaa mtoto wa kiume; na jina lake utamwita Yesu.[#Mt 1:21-23; Amu 13:3; Isa 7:14]

³²Huyo atakuwa mkuu, ataitwa Mwana wa Aliye Juu, na Bwana Mungu atampa kiti cha enzi cha Daudi, baba yake.[#2 Sam 7:12,13,16; Isa 9:7]

³³Ataimiliki nyumba ya Yakobo hata milele, na ufalme wake utakuwa hauna mwisho.[#Mik 4:7; Dan 7:14]

³⁴Mariamu akamwambia malaika, Litakuwaje neno hili, maana sijui mume?

³⁵Malaika akajibu akamwambia, Roho Mtakatifu atakujia juu yako, na nguvu zake Aliye Juu zitakufunika kama kivuli; kwa sababu hiyo hicho kitakachozaliwa kitaitwa kitakatifu, Mwana wa Mungu.[#Kut 13:12; Mt 1:18,20]

³⁶Tena, tazama, jamaa yako Elisabeti naye amechukua mimba ya mtoto wa kiume katika uzee wake; na mwezi huu ni wa sita kwake yeye aliyeitwa tasa;

³⁷kwa kuwa hakuna neno lisilowezekana kwa Mungu.[#Mwa 18:14]

³⁸Mariamu akasema, Tazama, mimi ni mjakazi wa Bwana; na iwe kwangu kama ulivyosema. Kisha malaika akaondoka akaenda zake.

Mariamu Amtembelea Elisabeti

³⁹Basi, Mariamu akaondoka siku hizo, akaenda hadi katika nchi yenye milima kwa haraka mpaka mji mmoja wa Yudea,

⁴⁰akaingia nyumbani kwa Zakaria akamwamkia Elisabeti.

⁴¹Ikawa Elisabeti aliposikia kule kuamkia kwake Mariamu, kitoto kichanga kikaruka ndani ya tumbo lake; Elisabeti akajazwa Roho Mtakatifu;[#Lk 1:15; Mwa 25:22]

⁴²akapaza sauti kwa nguvu akasema, Umebarikiwa wewe katika wanawake, naye mzao wa tumbo lako amebarikiwa.[#Kum 28:9; Amu 5:24]

⁴³Limenitokeaje neno hili, hata mama wa Bwana wangu anijie mimi?

⁴⁴Maana sauti ya kuamkia kwako ilipoingia masikioni mwangu, kitoto kichanga kikaruka kwa shangwe ndani ya tumbo langu.

⁴⁵Naye heri aliyesadiki; kwa maana yatatimizwa aliyoambiwa na Bwana.[#Lk 1:20; 11:28]

Wimbo wa Sifa wa Mariamu

⁴⁶Mariamu akasema,[#1 Sam 2:1-10]

Moyo wangu wamwadhimisha Bwana,

⁴⁷Na roho yangu imemfurahia Mungu, Mwokozi wangu;

⁴⁸Kwa kuwa ameutazama[#1 Sam 1:11; Lk 1:25; Zab 113:5,6; Lk 11:27]

Unyonge wa mjakazi wake.

Kwa maana, tazama, tokea sasa

Vizazi vyote wataniita mbarikiwa;

⁴⁹Kwa kuwa Mwenye nguvu amenitendea makuu,[#Zab 111:9]

Na jina lake ni takatifu.

⁵⁰Na rehema zake hudumu vizazi hata vizazi[#Zab 103:13,17]

Kwa hao wanaomcha.

⁵¹Amefanya nguvu kwa mkono wake;[#Zab 89:10; 2 Sam 22:28]

Amewatawanya walio na kiburi katika mawazo ya mioyo yao;

⁵²Amewaangusha wakuu katika viti vyao vya enzi;[#Ayu 5:11; 12:19; Zab 147:6; 1 Sam 2:7]

Na wanyonge amewainua.

⁵³Wenye njaa amewashibisha mema,[#1 Sam 2:5; Zab 34:10; 107:9]

Na wenye mali amewaondoa mikono mitupu.

⁵⁴Amemsaidia Israeli, mtumishi wake;[#Isa 41:8; Zab 98:3]

Ili kukumbuka rehema zake;

⁵⁵Kama alivyowaambia baba zetu,[#Mwa 17:7; 18:18; 22:17; Mik 7:20]

Abrahamu na uzao wake hata milele.

⁵⁶Mariamu akakaa naye kadiri ya miezi mitatu, kisha akarudi kwenda nyumbani kwake.

Kuzaliwa kwa Yohana Mbatizaji

⁵⁷Ikawa, siku za kuzaa kwake Elisabeti zilipotimia, alizaa mtoto mwanamume.

⁵⁸Wakasikia jirani zake na jamaa zake ya kwamba Bwana amemwongezea rehema zake, wakafurahi pamoja naye.

⁵⁹Ikawa siku ya nane wakaja kumtahiri mtoto; wakataka kumpa jina la babaye, Zakaria.[#Law 12:3; Mwa 17:12]

⁶⁰Mamaye akajibu akasema La, sivyo; bali, ataitwa Yohana.[#Lk 1:13]

⁶¹Wakamwambia, Hapana mtu katika jamaa zako aitwaye jina hilo.

⁶²Wakamwashiria babaye wajue atakavyo kumwita.

⁶³Akataka kibao, akaandika ya kwamba, Jina lake ni Yohana. Wakastaajabu wote.

⁶⁴Papo hapo kinywa chake kikafunguliwa na ulimi wake pia, akaanza kunena akimsifu Mungu.

⁶⁵Wakaingiwa na hofu wote waliokuwa wakikaa karibu nao; na mambo hayo yote yakatangazwa katika nchi yote ya Yudea yenye milima.

⁶⁶Na wote walioyasikia wakayaweka mioyoni mwao, wakisema, Mtoto huyu atakuwa wa namna gani? Kwa sababu mkono wa Bwana ulikuwa pamoja naye.

Unabii wa Zekaria

⁶⁷Na Zakaria, baba yake, akajazwa Roho Mtakatifu, akatabiri, akisema,

⁶⁸Atukuzwe Bwana, Mungu wa Israeli,[#Lk 7:16; Zab 41:13; 72:18]

Kwa kuwa amewajia watu wake, na kuwakomboa.

⁶⁹Ametusimamishia pembe ya wokovu[#1 Sam 2:10; Zab 18:2; 132:17]

Katika mlango wa Daudi, mtumishi wake.

⁷⁰Kama alivyosema tangu mwanzo

Kwa kinywa cha manabii wake watakatifu;

⁷¹Tuokolewe na adui zetu[#Zab 106:10]

Na mikononi mwao wote wanaotuchukia;

⁷²Ili kuwatendea rehema baba zetu,[#Zab 105:8; 106:45; Mwa 17:7; Law 26:42]

Na kulikumbuka agano lake takatifu;

⁷³Kiapo alichomwapia Abrahamu, baba yetu,[#Mwa 22:16,17; Mik 7:20]

⁷⁴Ya kwamba atatujalia sisi,[#Tit 2:12,14]

Tuokoke mikononi mwa adui zetu,

Na kumwabudu pasipo hofu,

⁷⁵Kwa utakatifu na kwa haki

Mbele zake siku zetu zote.

⁷⁶Nawe, mtoto, utaitwa nabii wake Aliye Juu,[#Mal 3:1; Mt 3:3]

Kwa maana utatangulia mbele za uso wa Bwana umtengenezee njia zake;

⁷⁷Uwajulishe watu wake wokovu,[#Yer 31:34]

Kwa kusamehewa dhambi zao.

⁷⁸Kwa njia ya rehema za Mungu wetu,[#Hes 24:17; Isa 60:1,2; Mal 4:2]

Ambazo kwa hizo mwangaza utokao juu umetufikia,

⁷⁹Kuwaangaza wakaao katika giza na uvuli wa mauti,[#Isa 9:2; 58:8; Mt 4:16]

Na kuiongoza miguu yetu kwenye njia ya amani.

⁸⁰Yule mtoto akakua, akaongezeka nguvu rohoni, akakaa majangwani hadi siku ile alipotokeza hadharani kwa Israeli.[#Mt 3:1]