Hakikisho la msaada wa Mungu na ombi la uponyaji

¹Heri amkumbukaye mnyonge;[#Mit 14:21; Mk 10:21; #41:1 Au maskini.]

BWANA atamwokoa siku ya taabu.

²BWANA atamlinda na kumhifadhi hai,

Naye atafanikiwa katika nchi;

Wala usimtie katika hali wamtakiayo adui zake.

³BWANA atamtegemeza alipo mgonjwa kitandani.

Katika ugonjwa wake unamponya maradhi yake yote.

⁴Nami nilisema, BWANA, unifadhili,[#Zab 6:2]

Uniponye roho yangu maana nimekutenda dhambi.

⁵Adui zangu wananitaja kwa maneno mabaya,

Atakufa lini, jina lake lipotee?

⁶Na mmoja wao akija kunitazama asema uongo,[#Zab 12:2]

Moyo wake hujikusanyia maovu,

Naye atokapo nje huyanena.

⁷Wote wanaonichukia wananong'onezana juu yangu,

Wananiwazia yaliyo mabaya zaidi.

⁸Wanafikiri pigo liualo limemshika,

Akalala asiweze kusimama tena.

⁹Hata rafiki yangu mwandani niliyemtumaini,[#Mt 26:23; Oba 1:7; Mk 14:18; Lk 22:21; Yn 13:18]

Aliyekula pamoja nami,

Ameniinulia kisigino chake.

¹⁰Lakini Wewe, BWANA, unifadhili,

Uniinue nipate kuwalipa.

¹¹Kwa neno hili nimejua ya kuwa wapendezwa nami,

Kwa kuwa adui yangu hajivunii kunishinda.

¹²Nami katika ukamilifu wangu umenitegemeza,[#Zab 34:15; Mdo 2:28]

Umeniweka mbele za uso wako milele.

* * *

¹³Na atukuzwe BWANA, Mungu wa Israeli,[#Zab 106:48]

Tangu milele hata milele. Amina na Amina.

KITABU CHA PILI