Sala ya ukombozi katika mateso

¹Ee Mungu, uniokoe,

Maana maji yamefika mpaka nafsini mwangu.

²Ninazama katika matope mengi,

Pasipowezekana kusimama.

Nimefika penye maji ya vilindi,

Mkondo wa maji unanigharikisha.

³Nimechoka kwa kulia kwangu,

Koo yangu imekauka.

Macho yangu yamedhoofika

Kwa kumngoja Mungu wangu.

⁴Wanaonichukia bure ni wengi[#Zab 35:19; Yn 15:25]

Kuliko nywele za kichwa changu.

Watakao kunikatilia mbali ni wengi,

Adui zangu kwa sababu isiyo kweli.

Hata mimi nililipishwa kwa nguvu

Vitu nisivyovichukua.

⁵Ee Mungu, unajua upumbavu wangu,

Wala hukufichwa dhambi yangu.

⁶Wanaokungoja Wewe wasiaibishwe,

Kwa ajili yangu, Bwana, MUNGU wa majeshi.

Wanaokutafuta Wewe wasifedheheshwe,

Kwa ajili yangu, Ee Mungu wa Israeli.

⁷Maana kwa ajili yako nimestahimili laumu,

Fedheha imenifunika uso wangu.

⁸Nimekuwa mgeni kwa ndugu zangu,[#Isa 53:3; Yn 1:11]

Na asiyetambuliwa na wana wa mama yangu.

⁹Maana mvuto wa nyumba yako umenila,[#1 Fal 19:10; Zab 119:139; Yn 2:17; Rum 15:3]

Na laumu zao wanaokulaumu zimenipata.

¹⁰Nilipolia na kuiadhibu roho yangu kwa kufunga,

Nikalaumiwa kwa hayo.

¹¹Nilipofanya gunia kuwa nguo zangu,[#1 Fal 9:7; Yer 24:9; Zab 44:13,14]

Nikawa kifani cha dharau kwao.

¹²Waketio langoni hunisema,[#Ayu 17:6; Omb 3:14]

Na nyimbo za walevi hunidhihaki.

¹³Nami maombi yangu nakuomba Wewe, BWANA,[#Isa 49:8; 2 Kor 6:2]

Wakati ukupendezao; Ee Mungu,

Kwa wingi wa fadhili zako unijibu,

Katika kweli ya wokovu wako.

¹⁴Uniponye kwa kunitoa matopeni,

Wala usiniache nikazama.

Na niponywe kutoka kwa wanaonichukia,

Na kutoka katika vilindi vya maji.

¹⁵Mkondo usinigharikishe, wala vilindi visinimeze,

Wala Shimo lisifumbe kinywa chake juu yangu.

¹⁶Ee BWANA, unijibu, maana fadhili zako ni njema,

Kwa kadiri ya rehema zako unielekee.

¹⁷Wala usinifiche uso wako, mimi mtumishi wako,

Maana mimi nimo taabuni, unijibu upesi.

¹⁸Uikaribie nafsi yangu, uikomboe,

Kwa sababu ya adui zangu unifidie.

¹⁹Wewe umejua kulaumiwa kwangu,[#Zab 22:6; Isa 53:3; Ebr 12:2]

Na kuaibika na kufedheheka kwangu,

Mbele zako Wewe wako watesi wangu wote.

²⁰Laumu imenivunja moyo,

Nami ninaugua sana.

Nikangoja aje wa kunihurumia, wala hakuna;

Na wa kunifariji, wala sikumwona mtu.

²¹Wakanipa uchungu kuwa chakula changu;[#Mt 27:34; Mt 27:48; Mk 15:36; Lk 23:36; Yn 19:28-29]

Na nilipokuwa na kiu wakaninywesha siki.

²²Meza yao mbele yao na iwe mtego;[#Rum 11:9-10; 2 Kor 3:14]

Naam, sikukuu zao sadaka ziwanase.

²³Macho yao yatiwe giza wasione,

Na viuno vyao uvitetemeshe daima.

²⁴Uimwage ghadhabu yako juu yao,

Na ukali wa hasira yako uwapate.

²⁵Makambi yao na yawe ukiwa,[#Mdo 1:20]

Pasiwe na mtu wa kukaa hemani mwao.

²⁶Maana wanamwudhi mtu uliyempiga Wewe,[#Isa 53:4]

Wanazidisha maumivu ya hao uliowatia jeraha.

²⁷Uwaongezee uovu juu ya uovu,[#Rum 9:31]

Wala wasipate msamaha kutoka kwako.

²⁸Na wafutwe katika kitabu cha uhai,[#Kut 32:32; Eze 13:9; Lk 10:20; Flp 4:3; Ebr 12:23; Ufu 3:5; 13:8; 17:8]

Wala pamoja na wenye haki wasiandikwe.

²⁹Nami niliye maskini na mtu wa huzuni,

Mungu, wokovu wako utaniinua.

³⁰Nitalisifu jina la Mungu kwa wimbo,

Nami nitamtukuza kwa shukrani.

³¹Nayo yatampendeza BWANA kuliko ng'ombe,

Au ndama mwenye pembe na kwato.

³²Walioonewa watakapoona watafurahi;

Enyi mmtafutao Mungu, mioyo yenu ihuishwe.

³³Kwa kuwa BWANA huwasikia wahitaji,

Wala hawadharau wafungwa wake.

³⁴Mbingu na nchi zimsifu,

Bahari na vyote viendavyo ndani yake.

³⁵Maana Mungu ataiokoa Sayuni, na kuijenga miji ya Yuda,[#Zab 57:1-3; 102:13,16; Isa 14:32; 44:26]

Na watu watakaa ndani yake na kuimiliki.

³⁶Wazawa wa watumishi wake watairithi,

Nao walipendao jina lake watakaa humo.