Sala ya Azaria 1

Sala ya Azaria tanurini

¹Nao vijana walitembea katikati ya moto, wakimsifu Mungu na kumhimidi BWANA.[#Dan 3:23]

²Ndipo Azaria akasimama akasali hivi, akifumbua kinywa chake katikati ya moto na kusema:

³Umehimidiwa, Ee Bwana, MUNGU wa baba zetu, na jina lako lastahili kusifiwa na kutuzwa milele.

⁴Maana Wewe u mwenye haki katika mambo yote uliyoyafanya; naam, matendo yako ni kweli, na njia zako ni haki, na hukumu zako zote ni za adili.

⁵Katika mambo yote uliyoyaleta juu yetu, na juu ya Yerusalemu, mji mtakatifu wa baba zetu, umetekeleza hukumu za adili;

⁶maana kwa kweli na haki umeyaleta hayo yote juu yetu kwa sababu ya dhambi zetu, kwa kuwa sisi tumetenda dhambi na kufanya maovu kwa kukuacha Wewe.

⁷Katika yote tumekosa sana, wala hatukuzitii amri zako na kuzishika; wala hatukufanya kama ulivyotuamuru ili tupate kufanikiwa.

⁸Basi, yote uliyotuletea, na yote uliyotutendea, umeyatenda kwa haki.

⁹Ulitutia katika mikono ya adui zetu, wasio na sheria, makafiri wa kuchukiza; na katika mikono ya mfalme asiye haki, mwovu sana kupita wote wa ulimwengu.

¹⁰Sasa hatuwezi kuvifumbua vinywa vyetu aibu na mashutumu yametupata sisi watumishi wako na wote wakuabuduo.

¹¹Usituache kabisa, kwa ajili ya jina lako, wala usilitangue agano lako na kutuondolea rehema zako,

¹²kwa ajili ya Abrahamu umpendaye, na kwa ajili ya Isaka mtumishi wako, na Israeli mtakatifu wako,

¹³ambao uliwaahidia ya kuwa utauzidisha uzao wao kama nyota za mbinguni na kama mchanga uliopo pwani.

¹⁴Maana sisi, Ee BWANA, tumekuwa duni kuliko mataifa mengine yote, na kudhulumiwa leo katika ulimwengu wote kwa sababu ya dhambi zetu.

¹⁵Sasa hakuna mfalme wala nabii wala kiongozi; hakuna dhabihu wala kafara wala sadaka wala uvumba; wala mahali pa kukutolea dhabihu na kuona rehema.

¹⁶Lakini kwa moyo uliovunjika na kwa roho nyenyekevu tukubaliwe nawe, na sadaka yetu iwe machoni pako leo kama dhabihu za kondoo dume na ng'ombe, na kama kondoo wanono elfu kumi.

¹⁷Nasi tukufuate kwa unyofu, maana wanaokutumaini Wewe hawataaibika.

¹⁸Na sasa tunakufuata kwa moyo wote; tunakucha, na kuutafuta uso wako.

¹⁹Usitufedheheshe, bali ututendee kwa kadiri ya fadhili zako, sawasawa na wingi wa huruma zako.

²⁰Utuokoe kwa kadiri ya maajabu yako, na kulitukuza jina lako, Ee BWANA.

²¹Na waaibishwe wote wanaowaudhi watumishi wako; wafedheheke katika uwezo wao na ukuu wao.

²²Nguvu zao zivunjike; nao wapate kujua ya kuwa Wewe ndiwe Bwana, MUNGU peke yako, mtukufu juu ya ulimwengu wote.

Wimbo wa Wayahudi Watatu

²³Basi, watumishi wa mfalme waliowatupa ndani ya tanuri hawakulegea katika kuongeza moto kwa mafuta na lami na makumbi na kuni,

²⁴hata mwako wa moto ukapanda juu ya tanuri kadiri ya dhiraa arubaini na tisa.

²⁵Ukaenea, ukawateketeza wale Wakaldayo waliokuwa karibu na tanuri.

²⁶Lakini malaika wa BWANA alishukia ndani ya tanuri pamoja na Azaria na wenzake, akaukumba mwako wa moto katika tanuri,[#Tob 5:4]

²⁷akafanya katikati ya tanuri mfano wa upepo wa unyevu uvumao, hata moto haukuwagusa kamwe, wala kuwadhuru au kuwasumbua.

Wimbo wa vijana watatu

²⁸Ndipo wale watatu, kama kwa kinywa kimoja, walimsifu Mungu na kumtukuza na kumhimidi, wakisema:

²⁹Umehimidiwa. Ee Bwana, MUNGU wa baba zetu:

Wastahili kusifiwa na kuadhimishwa milele.

Limehimidiwa jina lako takatifu, tukufu;

Lastahili kusifiwa na kuadhimishwa milele.

³⁰Umehimidiwa katika hekalu la fahari yako takatifu;

Wastahili kusifiwa na kutukuzwa milele.

³¹Umehimidiwa juu ya kiti cha ufalme wako;

Wastahili kusifiwa na kuadhimishwa milele.

³²Umehimidiwa utazamaye vilindi, uketiye juu ya makerubi;

Wastahili kusifiwa na kuadhimishwa milele.

³³Umehimidiwa katika anga la mbinguni

Wastahili kusifiwa na kutukuzwa milele.

³⁴Enyi viumbe vyote vya BWANA mhimidini BWANA;