¹Ee BWANA, baba na Mungu wa uzima wangu,

Usinitupe katika mashauri ya adui,

Wala usiniache nianguke kwayo.

²Nani ataweka mijeledi mawazoni,

Na mchapo wa hekima moyoni mwangu?

Nisikose adhabu ya ujinga wangu,

Moyo wangu usiachilie dhambi.

³Ujinga wangu usizidi kuwa mwingi,

Wala dhambi zangu zisiongezeke;

Nisije nikaanguka mbele ya watesi,

Adui yangu asitukuke juu yangu.

⁴Ee BWANA, baba na Mungu wa uzima wangu,

Usinipe macho ya kiburi,

⁵Uiondoe tamaa mbali nami;

⁶Choyo na uzinzi yasinipate,

Wala moyo wenye tamaa mbaya usinisibu.

Viapo

⁷Wanangu, sikilizeni utawala wa kinywa; aushikaye hatakamatwa.

⁸Mwenye dhambi katika midomo yake atapatwa, na mshutumu na mwenye kiburi atajikwaa.

⁹Usikizoeze kinywa chako kuapa, wala usifuate desturi ya kulitaja jina lake Mtakatifu.[#Mt 5:34; Yak 5:12]

¹⁰Yaani, mtumishi akichapwa daima hakosi kuchubuka; hivyo aapaye na kutamja Mungu daima hawezi kusafika dhambi.

¹¹Mtu mwenye viapo vingi atajaa uovu; wala adhabu haitaondoka nyumbani mwake; akikosa dhambi yake itakuwa juu yake; akikosa kuiangalia ametenda dhambi maradufu; akiwa ameapa bure hatahakikishwa; kwa maana nyumba yake itajaa misiba.

Lugha Chafu

¹²Kuna desturi ya mazungumzo inayolingana na kuapa; walakini isionekane katika urithi wa Yakobo; maana hayo yote yawe mbali na wenye haki, wasije wakagaagaa matopeni mwa dhambi.

¹³Usikizoeze kinywa chako kunena matusi, kwa maana ndani yake mna maneno ya dhambi.

¹⁴Kumbuka baba yako na mama yako, uketipo katika mkutano wa wakuu; usije ukawa msahaulifu mbele yao, ukawa mpumbavu kwa sababu ya desturi yako; mradi utataka kama usingalizaliwa, na kuilaani siku ya kuzaliwa kwako.

¹⁵Wala yeye aliyezoea usemi uliofedheheka hapati adabu siku zote za maisha yake.

Kuhusu Dhambi ya Zinaa

¹⁶Watu wa namna mbili huzidisha dhambi,

Naye wa namna ya tatu ataleta ghadhabu;

¹⁷Mwenye unyege,

Na mwasherati,

Naye atembeaye mbali na kitanda chake.

Moto uwakao hautazimika hata ukome; wala mwasherati haachi hata moto umteketeze mwili na nyama. Mkate wa kila namna ni mtamu kwake, haachi mpaka kufa.

¹⁸Husema moyoni mwake, Nani anionaye? Giza limenizunguka, na kuta zimenificha, wala hakuna anionaye; nimwogope nani? Yeye Aliye Juu hatazikumbuka dhambi zangu,

¹⁹Basi, macho ya watu ndiyo hofu yake; wala hajui ya kuwa macho ya BWANA yang'aa kuliko jua mara elfu, yanatazama njia zote za wanadamu, yanachunguza mahali pa siri.

²⁰Mambo yote yalijulikana naye kabla hayajaumbwa, na kadhalika baada ya kukamilika.

²¹Hakika mtu huyo ataadhibiwa katika njia za mjini; hata na mahali asipodhani atafumaniwa.

Mwanamke mzinifu

²²Vivyo hivyo naye mke amwachaye mume wake, akaingiza mrithi kwa mgeni.

²³Kwa maana kwanza, ameivunja sheria yake Aliye Juu; pili amemkosa mume wake mwenyewe; tatu, amejifanya mzinzi kwa ukahaba, na kuingiza watoto kwa mgeni.

²⁴Huyo ataletwa mbele ya kusanyiko, na juu ya watoto wake kutakuwa maulizo.

²⁵Watoto wake hawatatia mizizi, wala matawi yake hayatazaa matunda.

²⁶Ataacha ukumbusho wake kuwa laana, wala fedheha yake haifutiki.

²⁷Na watu watakaosalia watajua ya kwamba hakuna jema kuliko kumcha BWANA, wala hakuna tamu kuliko kuzishika amri zake.