Musa

¹Musa alipendwa na Mungu na wanadamu; ambaye kumbukumbu lake lina baraka.[#Kut 6:28—11:10; 20:1-21]

²Alimfananisha na watakatifu kwa utukufu, akamwadhimisha hata adui zake wakamwogopa;

³na kwa maneno yake akayahimiza maajabu. Akamtukuza mbele ya mfalme, akampa amri mbele ya watu wake, akamwonesha kwa sehemu utukufu wake.

⁴Akamtakasa katika uaminifu wake na upole wake, akamchagua katika wote wenye mwili.

⁵Akamsikiza sauti yake, na kumwingiza katika wingu la giza; na kumpa amri uso kwa uso, ndiyo sheria ya uzima na maarifa; ili amfundishe Yakobo maagizo yake, na Israeli hukumu zake.

Haruni

⁶Haruni naye alimfanya kuwa mtukufu; ambaye alikuwa mtakatifu kama yule ndugu yake wa kabila ya Lawi.[#Kut 4:14]

⁷Akamsimamisha kwa agizo la milele, kwamba apewe heshima ya ukuhani; akampamba mapambo mazuri, akamvika vazi la utukufu.[#Kut 28:1-43]

⁸Akamvika ukamilifu wa uzuri, akampamba utukufu na nguvu; suruali ya bafta, na kanzu ndefu, na joho.

⁹Akamzungushia kengele na makomamanga ya dhahabu, ili kutoa sauti tamu akienda; kutoa sauti ya kusikika hekaluni, na kuwa ukumbusho wa wana wa watu wake.

¹⁰Tena vazi takatifu lenye dhahabu na samawi na urujuani, kazi ya mtarizi; na mfuko wa hukumu wenye Urimu na Thumimu, mwekundu uliosukwa, kazi ya fundi;

¹¹na vito vilivyochorwa mfano wa mhuri juu ya deraya katika kijalizo cha dhahabu, kazi ya msanii; kila kito kiwe ukumbusho uliochorwa maandiko, kwa kadiri ya hesabu ya kabila za Israeli.

¹²Tena taji la dhahabu juu ya kofia, imenakishwa kama mhuri neno hili UTAKATIFU, pambo la heshima, kazi maarufu, ya kutamanika kwa macho, njema na nzuri.

¹³Kabla yake havikuwako kama hiyo; hakuna mgeni aliyejivika navyo, ila watoto wake daima katika vizazi vyao.

¹⁴Matoleo yake yateketezwa pia, kila siku mara mbili daima.

¹⁵Musa alimweka wakfu, akimpaka mafuta matakatifu; ikawa kwake agano la milele, na kwa wazao wake kama siku za mbinguni; ili kumhudumia Mungu, na kufanya kazi ya ukuhani, na kuwabariki watu wake kwa jina lake.[#Law 8:1-36]

¹⁶Akamchagua katika wote wenye uhai, ili kutoa sadaka ya kuteketezwa, na mafuta, na sadaka ya manukato matamu, na kumbukumbu; na kufanya upatanisho kwa wana wa Israeli.

¹⁷Naam, kwa amri yake alimpa mamlaka katika maagizo na hukumu; naye akawafundisha watu wake maagizo, na wana wa Israeli hukumu.

¹⁸Wageni walimkusanyikia na kumwonea wivu jangwani, Dathani na Abiramu pamoja na kikosi chao, na kusanyiko la Kora, katika nguvu ya hasira yao.[#Hes 16:1-35]

¹⁹BWANA akaliona hilo, nalo likamkasirisha, na katika ghadhabu ya hasira yake akawaangamiza. Akaumba ishara juu yao, na kwa moto wake wa miali akawateketeza.

²⁰Akazidi kumtukuza Haruni, akampa urithi.

Alimpa matoleo ya bega kwa chakula,

Wale dhabihu za kuteketezwa za BWANA;

²¹Malimbuko akamwekea kuwa sehemu yake,

Kuwa kipawa chake na cha wazao wake.

²²Maana hana urithi katika nchi ya watu,

Wala sehemu yoyote katikati yao;

Mradi BWANA ni sehemu ya urithi wao,

Katikati ya wana wa Israeli.

Finehasi

²³Finehasi mwana wa Eleazari ndiye wa tatu, mtukufu katika uhodari wake; yaani, yeye alifanya wivu kwa ajili ya Mungu, akasimama imara walipogeuka watu; katika wema wa juhudi ya roho yake akafanya upatanisho kwa Israeli.[#Hes 25:7-13]

²⁴Kwa hiyo kwa ajili yake Mungu akaliimarisha agizo, ndilo agano la amani la kudumisha patakatifu; ya kwamba yeye na wazao wake wawe na heshima ya ukuhani hata milele.

²⁵Kama vile lilivyo agano na Daudi mwana wa Yese wa kabila ya Yuda, ya kwamba urithi wa ufalme awe nao peke yake na toka mwana hata mwana; ndivyo ulivyo urithi wa Haruni, una yeye na wazao wake.

²⁶Sasa mhimidini BWANA aliye mwema,

Awatiaye ninyi taji la utukufu;

Na akujalie wewe hekima moyoni mwako,

Ili uwahukumu watu wake kwa haki;

Mema yao yasipate kubatilika,

Wala enzi yako hata vizazi vyote.