Uhai Wenu Mpya

¹Mlifufuka pamoja na Kristo kutoka kwa wafu. Hivyo ishini maisha mapya, mkiyatazamia yaliyo mbinguni, ambako Kristo ameketi mkono wa kulia wa Mungu.

²Msiyafikirie yaliyo hapa duniani bali yaliyo mbinguni.

³Utu wenu wa kwanza umekufa, na utu wenu mpya umetunzwa na Kristo katika Mungu.

⁴Kristo ndiye utu wenu mpya sasa, na atakaporudi mtashiriki katika utukufu wake.

⁵Kwa hiyo kiueni chochote kilicho cha kidunia kilichomo ndani yenu: uasherati, matendo machafu, mawazo na tamaa mbaya. Msijitakie na kujikusanyia vitu vingi, kwani ni sawa na kuabudu mungu wa uongo.

⁶Mungu ataionyesha hasira yake kwa wale wasiomtii, kwa sababu ya maovu wanayotenda.[#3:6 Baadhi ya nakala za Kiyunani hazina maneno haya.]

⁷Ninyi pia mlifanya maovu haya huko nyuma, mlipoishi kama wao.

⁸Lakini sasa, jitengeni mbali na mambo haya katika maisha yenu: hasira, ukorofi, chuki, na mazungumzo yenye matusi.

⁹Msiambiane uongo ninyi kwa ninyi. Ninyi mmeyavua mavazi ya kale; utu wa kale mliokuwa nao na matendo mabaya mliyotenda hapo awali.

¹⁰Na sasa mmevaa utu mpya unaofanywa upya kila siku hata kuufikia ufahamu kamili wa Kristo. Mfano wenu wa maisha mapya ni Kristo, aliye mfano na sura ya Mungu aliyewaumba ninyi.

¹¹Katika utu huu mpya haijalishi ikiwa wewe ni Myunani au Myahudi, umetahiriwa au hujatahiriwa. Haijalishi pia ikiwa unazungumza lugha tofauti au hata kama wewe ni mtu asiyestaarabika, ikiwa ni mtumwa ama mtu huru. Kristo ndiye wa muhimu zaidi, naye yumo ndani yenu ninyi nyote.[#3:11 Au Msithiani. Wasithiani ni watu waliojulikana kuwa watu waishio porini na wasio na ustaarabu wa kibinadamu.]

Uhai Wenu Mpya Miongoni Mwenu

¹²Mungu amewachagua na kuwafanya ninyi kuwa watu wake walio watakatifu. Anawapenda. Hivyo, jivikeni matendo haya na muwe na huruma: wema, wanyenyekevu, wapole na wenye subira.

¹³Msikasirikiane, bali msameheane. Mtu yeyote akikukosea, msamehe. Wasameheni wengine kwa sababu Bwana amewasamehe ninyi.

¹⁴Pamoja na haya yote, vaeni upendo. Upendo ndicho kitu kinachounganisha kila kitu katika umoja mkamilifu.

¹⁵Amani inayotoka kwa Kristo itawale fahamu zenu. Mliitwa kwa ajili ya amani ili muwe pamoja katika mwili mmoja. Muwe na shukrani daima.[#3:15 Mwili wa kiroho wa Kristo, yaani Kanisa ambalo ni watu wake.]

¹⁶Na mafundisho ya Kristo yakae kwa wingi ndani yenu. Mfundishane na mshauriane ninyi kwa ninyi kwa hekima yote, mkiimba zaburi, nyimbo za sifa na nyimbo zinaowezeshwa na roho na kumshukuru Mungu katika mioyo yenu.[#3:16 Yaani Injili au Ujumbe kuhusu Kristo au Neno la Mungu.]

¹⁷Kila mnachosema na kutenda, mkifanye kwa ajili ya Yesu Kristo Bwana wenu huku mkimshukuru Mungu Baba kupitia Yesu Kristo.

Utu Wenu Mpya Mkiwa Nyumbani

¹⁸Wake, muwe radhi kuwatumikia waume zetu. Ni jambo sahihi kufanya katika kumfuata Bwana.

¹⁹Waume wapendeni wake zenu na msiwe na hasira nao.

²⁰Watoto, watiini wazazi wenu katika mambo yote. Hili humfurahisha Bwana.

²¹Wababa, msiwakorofishe watoto wenu, mkiwa wagumu kupendezwa nao; wanaweza kukata tamaa.

²²Enyi watumwa, watiini mabwana zenu katika mambo yote. Muwe watii kila wakati, hata kama wao hawawezi kuwaona. Msijifanye kazi kwa bidii ili wawatendee mema. Mnapaswa kuwatumikia mabwana zenu kwa moyo kwa sababu mna hofu ya Bwana.[#3:22 Au “wakuu wenu”.]

²³Kila kazi mnayoifanya, ifanyeni kwa bidii. Fanyeni kama mnamfanyia Bwana wenu wa mbinguni, na si kama mnamfanyia bwana wa dunia hii.

²⁴Mnajua kwamba mtapokea kutoka kwa Bwana ujira aliowaahidi watu wake. Ndiyo, mnamtumikia Kristo aliye Bwana wenu halisi.[#3:24 Au “Mkuu”.]

²⁵Kumbukeni kuwa Mungu hana upendeleo; kila anayefanya uovu ataadhibiwa kwa sababu ya uovu wake.