ISAIAS 21

Ang Pagbagsak ng Babilonia

¹Ang pahayag tungkol sa ilang ng karagatan.

Kung paanong dumaan ang mga ipu-ipo sa Negeb

ito'y nagmumula sa ilang

mula sa isang kakilakilabot na lupain.

²Isang matinding pangitain ang ipinahayag sa akin;

ang magnanakaw ay nagnanakaw,

at ang mangwawasak ay nangwawasak.

Umahon ka, O Elam;

kumubkob ka, O Media;

lahat ng buntong-hininga na nilikha niya'y

aking pinatigil na.

³Kaya't ang aking mga balakang ay punô ng kahirapan;

punô ako ng paghihirap,

gaya ng mga hirap ng babae sa panganganak,

ako'y nakayuko na anupa't hindi ako makarinig;

ako'y nanlulumo na anupa't hindi ako makakita.

⁴Ang aking isipan ay umiikot, ang pagkasindak ay nakabigla sa akin;

ang pagtatakipsilim na aking kinasabikan

ay nagpanginig sa akin.

⁵Sila'y naghanda ng hapag-kainan,

iniladlad nila ang alpombra,

sila'y nagsisikain, sila'y nagsisiinom.

Magsitindig kayong mga pinuno,

langisan ninyo ang kalasag!

⁶Sapagkat ganito ang sinabi ng Panginoon sa akin,

“Ikaw ay humayo, maglagay ka ng bantay;

ipahayag niya kung ano ang nakikita niya.

⁷Kapag siya'y nakakita ng mga nakasakay, mga mangangabayo na dala-dalawa,

nakasakay sa mga asno, nakasakay sa mga kamelyo,

makinig siyang masikap,

ng buong sikap.”

⁸At siya na nakakita ay sumigaw:

“O Panginoon, ako'y nakatayo sa muog,

patuloy kapag araw,

at ako'y nakatanod sa aking bantayan

nang buong magdamag.

⁹Tingnan mo, dumarating ang mga mangangabayo,[#Apoc. 14:8; 18:2]

mga mangangabayong dala-dalawa!”

At siya'y sumagot at nagsabi,

“Bumagsak, bumagsak ang Babilonia;

at lahat na larawang inanyuan ng kanyang mga diyos

ay nagkadurug-durog sa lupa.”

¹⁰O ikaw na aking giniik, at trigo ng aking giikan,

ang aking narinig sa Panginoon ng mga hukbo,

sa Diyos ng Israel, ang aking ipinahayag sa iyo.

Ang Pahayag tungkol sa Edom

¹¹Ang pahayag tungkol sa Duma.

May tumatawag sa akin mula sa Seir,

“Bantay, gaano pa katagal ang gabi?

Bantay, gaano pa katagal ang gabi?”

¹²Sinabi ng bantay,

“Ang umaga ay dumarating, at gayundin ang gabi.

Kung kayo'y mag-uusisa, mag-usisa kayo;

muli kayong bumalik.”

Ang Pahayag tungkol sa Arabia

¹³Ang pahayag tungkol sa Arabia.

Sa gubat ng Arabia ay tumigil kayo,

O kayong naglalakbay na mga Dedaneo.

¹⁴Sa nauuhaw ay magdala kayo ng tubig,

salubungin ng tinapay ang takas,

O mga naninirahan sa lupain ng Tema.

¹⁵Sapagkat sila'y tumakas mula sa mga tabak,

mula sa binunot na tabak,

mula sa busog na nakaakma,

at mula sa matinding digmaan.

¹⁶Sapagkat ganito ang sinabi ng Panginoon sa akin, “Sa loob ng isang taon, ayon sa mga taon ng magpapaupa, ang lahat ng kaluwalhatian ng Kedar ay magwawakas;

¹⁷at ang nalalabi sa mga mamamana, sa mga makapangyarihang lalaki na mga anak ni Kedar ay magiging iilan, sapagkat ang Panginoon , ang Diyos ng Israel, ay siyang nagsalita.”