MGA AWIT 123

¹Sa iyo'y aking itinitingin ang mga mata ko,

O ikaw na sa kalangitan ay nakaupo sa trono!

²Gaya ng mga mata ng mga alipin

na nakatingin sa kamay ng kanilang panginoon,

gaya ng mga mata ng alilang babae

na nakatingin sa kamay ng kanyang panginoong babae,

gayon tumitingin ang aming mga mata sa Panginoon naming Diyos,

hanggang sa siya'y maawa sa amin.

³Maawa ka sa amin, O Panginoon , maawa ka sa amin,

sapagkat labis-labis na ang paghamak sa amin.

⁴Ang aming kaluluwa'y lubos na napupuno

ng paglibak ng mga nasa kaginhawahan,

ng paghamak ng palalo.