MGA AWIT 20

¹Ang Panginoon ay sumasagot sa iyo sa araw ng kaguluhan!

Ang pangalan ng Diyos ni Jacob ang magtataas sa iyo!

²Nawa'y saklolohan ka niya mula sa santuwaryo,

at alalayan ka mula sa Zion!

³Maalala nawa niya ang lahat mong mga handog,

at tanggapin niya ang iyong mga handog na sinusunog! (Selah)

⁴Nawa'y ang nais ng iyong puso ay ipagkaloob niya sa iyo,

at tuparin ang lahat ng mga panukala mo!

⁵Kami'y magagalak sa iyong pagliligtas,

at sa pangalan ng aming Diyos ay aming itataas ang aming mga watawat!

Ganapin nawa ng Panginoon ang kahilingan mong lahat!

⁶Ngayo'y nalalaman ko na tutulungan ng Panginoon ang kanyang pinahiran ng langis;

sasagutin niya siya mula sa kanyang banal na langit

na may makapangyarihang pagtatagumpay sa pamamagitan ng kanyang kanang kamay.

⁷Ipinagmamalaki ng ilan ang mga karwahe, at ang iba ay ang mga kabayo;

ngunit ipinagmamalaki namin ang pangalan ng Panginoon naming Diyos.

⁸Sila'y mabubuwal at guguho,

ngunit kami ay titindig at matuwid na tatayo.

⁹Bigyan ng tagumpay ang hari, O Panginoon ,

sagutin nawa kami kapag kami ay tumatawag.