1Naging hari ng Israel ang anak ni Jehu na si Joahaz nang ikadalawampuʼt tatlong taon ng paghahari ng anak ni Ahazias na si Joas sa Juda. Sa Samaria siya tumira, at naghari siya roon sa loob ng labimpitong taon.
2Masasama ang ginawa ni Joahaz sa paningin ng Panginoon . Sumunod siya sa mga ginawa ni Jeroboam, na anak ni Nebat, na naging dahilan ng pagkakasala ng mga taga-Israel. Hindi niya tinalikuran ang mga kasalanang ito.
3Kaya nagalit nang matindi ang Panginoon sa Israel. Hinayaan niyang masakop ito ni Haring Hazael ng Aram at ng anak nitong si Ben-hadad nang matagal na panahon.
4Nanalangin si Joahaz sa Panginoon at pinakinggan siya ng Panginoon , sapagkat nakita ng Panginoon ang sobrang kalupitan ng hari ng Aram sa Israel.
5Binigyan sila ng Panginoon ng tao na magliligtas sa kanila mula sa mga taga-Aram. Kaya muling namuhay nang may kapayapaan ang mga Israelita tulad ng dati.
6Pero hindi sila tumigil sa paggawa ng mga kasalanang ginawa ng pamilya ni Jeroboam, na naging dahilan ng pagkakasala ng mga Israelita. Nanatiling nakatayo ang posteng imahen ng diyosang si Ashera sa Samaria.
7Walang natira sa mga sundalo ni Joahaz maliban sa limampung mangangabayo, sampung karwahe at sampung libong sundalo, dahil ang iba ay pinatay ng hari ng Aram, na parang alikabok na tinatapak-tapakan.
8Ang iba pang salaysay tungkol sa paghahari ni Joahaz, at ang lahat ng kanyang ginawa at pagtatagumpay ay nakasulat sa Aklat ng Kasaysayan ng mga hari ng Israel.
9Nang mamatay si Joahaz, inilibing siya sa Samaria, sa libingan ng kanyang mga angkan. At ang anak niyang si Jehoas ang pumalit sa kanya bilang hari.
10Naging hari ng Israel ang anak ni Joahaz na si Jehoas nang ikatatlumpuʼt pitong taon ng paghahari ni Joas sa Juda. Sa Samaria siya tumira, at naghari siya roon sa loob ng 16 na taon.
11Masama ang mga ginawa niya sa paningin ng Panginoon . Sumunod siya sa mga ginawa ni Jeroboam, na anak ni Nebat, na naging dahilan ng pagkakasala ng mga taga-Israel.
12Ang iba pang salaysay tungkol sa paghahari ni Jehoas at lahat ng ginawa niya at pagtatagumpay, pati ang pakikipaglaban kay Haring Amazias ng Juda ay nakasulat sa Aklat ng Kasaysayan ng mga hari ng Israel.
13Nang mamatay si Jehoas, inilibing siya sa libingan ng mga hari ng Israel sa Samaria. Ang anak niyang si Jeroboam II ang pumalit sa kanya bilang hari.
14Nang magkasakit si Eliseo at malapit nang mamatay, pumunta sa kanya si Haring Joas noong buháy pa ito at umiyak. Sinabi ni Jehoas, “Ama ko! Ama ko! Ang mga karwahe at mangangabayo ng Israel!”[#13:14 : Maaring ang ibig sabihin, si Eliseo ay tagapagtanggol ng Israel o walang makapagtatanggol sa Israel kung wala siya.]
15Sinabi ni Eliseo, “Kumuha ka ng pana at mga palaso.” Ginawa nga ito ni Joas.
16Sinabi ni Eliseo, “Hawakan mo ang pana.”
Habang hawak ito ni Joas, ipinatong ni Eliseo ang kamay niya kay Joas
17at sinabi, “Buksan mo ang bintana sa bandang silangan.” Binuksan nga niya ito.
Pagkatapos, sinabi ni Eliseo, “Pumana ka.” Pumana nga siya.
Sinabi ni Eliseo, “Ang palasong iyon ay palatandaan na pagtatagumpayin ka ng Panginoon laban sa Aram. Tatalunin mo ang mga Arameo sa Afek hanggang sa malipol sila.”
18Muling sinabi ni Eliseo kay Joas na kumuha siya ng mga palaso. Nang makakuha siya, sinabi ni Eliseo, “Panain mo ang lupa.” Pinana nga niya ang lupa ng tatlong beses at huminto siya.
19Nagalit ang lingkod ng Diyos sa kanya at sinabi, “Pinana mo dapat ng lima o anim na beses para tuluyan mong mawasak ang lahat ng Arameo. Pero ngayon, tatlong beses mo lang sila matatalo.”
20Kinalaunan, namatay si Eliseo at inilibing.
Tuwing tagsibol, may grupo ng mga tulisang Moabita na lumulusob sa Israel.
21Minsan, may mga Israelita na naglilibing ng patay pero nang makita nila ang grupo ng mga Moabita na lumulusob, naihagis nila ang bangkay sa pinaglibingan kay Eliseo at sila ay tumakas. Nang sumagi ang bangkay sa mga buto ni Eliseo, nabuhay ang patay at tumayo.
22Pinahirapan ni Haring Hazael ng Aram ang Israel sa buong panahon ng paghahari ni Joahaz.
23Pero kinahabagan at inalala sila ng Panginoon dahil sa pangako niya kina Abraham, Isaac, at Jacob. Hanggang ngayon, hindi niya ito winawasak o itinatakwil.
24Namatay si Haring Hazael ng Aram, at ang anak niyang si Ben-hadad ang pumalit sa kanya bilang hari.
25Natalo ni Jehoas si Ben-hadad ng tatlong beses. Nabawi niya ang mga bayang kinuha ng ama ni Ben-hadad na si Hazael mula sa ama niyang si Joahaz nang maglaban ang mga ito.