Hoseas 6

Hindi Tapat ang Pagsisisi ng Israel

¹Nag-usap-usap ang mga taga-Israel.

Sabi nila, “Halikayo!

Magbalik-loob tayo

sa Panginoon .

Sinaktan niya tayo,

ngunit siya rin

ang magpapagaling

sa atin.

²Para tayong mga patay

na agad niyang bubuhayin.

Hindi magtatagal,

at ibabangon niya tayo

upang mamuhay

sa kanyang presensya.

³Pagsikapan nating makilala

ang Panginoon .

Siyaʼy tiyak na darating,

kasing tiyak ng pagsikat ng araw.

Darating siyang parang ulan

na magdidilig sa mga lupain.”

⁴“O Israel at Juda,[#6:4 : Sa Hebreo, Efraim. Makikita rin ang salitang Efraim sa Hebreo sa talata 10|HOS 6:4. Tingnan ang talababa sa 4:17.]

ano ang gagawin ko sa inyo?

Ang pag-ibig ninyo sa akiʼy

parang ambon o hamog

sa umaga na madaling mawala.

⁵Kaya nga binalaan ko kayo

sa pamamagitan ng mga propeta

na kayoʼy mapapahamak

at mamamatay.

Hahatulan ko kayo

na kasimbilis ng kidlat.

⁶Sapagkat hindi ang inyong mga handog

ang nais ko,

kundi ang inyong pagmamahal.

Mas nanaisin ko pang kilalanin ninyo ako

bilang Diyos

kaysa sa mag-alay kayo

ng mga handog na sinusunog.

⁷Ngunit tulad ni Adan,

sinira ninyo ang kasunduan natin.

Nagtaksil kayo sa akin diyan

sa inyong lugar.

⁸Ang bayan ng Gilead

ay tirahan ng mga makasalanan

at nabahiran ng mga bakas

ng mga paang madudugo.

⁹Ang inyong mga pari

ay parang mga tulisan na

nag-aabang ng kanilang mabibiktima.

Pumapatay sila sa daang patungo

sa Shekem,

at gumagawa ng maraming

nakakahiyang gawain.

¹⁰Mga taga-Israel, kakila-kilabot

ang nakita ko sa inyo.

Sumasamba kayo

sa mga diyos-diyosan,

kaya naging marumi kayo.

¹¹“Kayo ring mga taga-Juda

ay nakatakda nang parusahan.

“Nais ko sanang ibalik

ang mabuting kalagayan

ng aking mga mamamayan.”