Juan 9

Pinagaling ni Hesus ang Isang Bulag

¹Habang naglalakad si Hesus, may nakita siyang isang lalaki. Ang lalaking ito ay ipinanganak na bulag.

²Tinanong si Hesus ng mga alagad niya, “Guro, sino po ba ang nagkasala at ipinanganak siyang bulag? Siya po ba o ang mga magulang niya?”

³Sumagot si Hesus, “Hindi dahil sa kasalanan niya o ng mga magulang niya kaya ipinanganak siyang bulag. Nangyari ito upang maipakita ang kapangyarihan ng Diyos sa pamamagitan ng pagpapagaling sa kanya.

⁴Dapat na nating gawin ang mga ipinapagawa ng Diyos na siyang nagsugo sa akin habang araw pa, dahil pagsapit ng gabi ay wala nang makakapagtrabaho.

⁵Habang akoʼy nasa mundo, ako ang ilaw ng mundo.”

⁶Pagkasabi niya nito, dumura siya sa lupa, gumawa ng putik mula sa dura at ipinahid niya sa mata ng bulag.

⁷Sinabi ni Hesus sa bulag, “Pumunta ka sa paliguan ng Shiloam at maghilamos ka roon.” (Ang ibig sabihin ng Siloam ay “Sinugo”.) Pumunta nga roon ang bulag at naghilamos. Nang bumalik siya ay nakakakita na siya.

⁸Dahil dito, nagtanungan ang mga kapitbahay niya at ang iba pang mga nakakita sa kanya noong namamalimos pa siya. Sinabi nila, “Hindi baʼt siya ang dating nakaupo at namamalimos?”

⁹Sinabi ng iba, “Siya nga.”

Ngunit sinabi naman ng iba, “Hindi, kamukha lang niya iyon.”

Kaya ang lalaki na mismo ang nagsabi, “Ako nga iyon.”

¹⁰“Paano ka nakakita?” tanong nila.

¹¹Sumagot siya, “Ang lalaking tinatawag na Hesus ay gumawa ng putik. Ipinahid niya ito sa mga mata ko at sinabi, ‘Pumunta ka sa paliguan ng Siloam at maghilamos.’ Kaya pumunta ako roon at naghilamos, at pagkatapos ay nakakita na ako.”

¹²Nagtanong ang mga tao, “Nasaan na siya?”

Sumagot ang lalaki, “Hindi ko alam.”

Inimbestigahan ng mga Pariseo ang Pagpapagaling

¹³Dinala nila sa mga Pariseo ang dating bulag.

¹⁴Araw noon ng Pamamahinga nang gumawa si Hesus ng putik at pinagaling ang bulag.

¹⁵Kaya tinanong din siya ng mga Pariseo kung paano siya nakakita. At sinabi ng lalaki, “Nilagyan niya ng putik ang mga mata ko. Naghilamos ako, at pagkatapos ay nakakita na ako.”

¹⁶Sinabi ng ilang Pariseo, “Hindi mula sa Diyos ang taong gumawa nito, dahil hindi niya sinusunod ang utos tungkol sa Araw ng Pamamahinga.”

Ngunit sinabi naman ng iba, “Kung makasalanan siya, paano siya nakakagawa ng ganitong himala?” Hindi magkasundo ang mga opinyon nila tungkol kay Hesus.

¹⁷Kaya tinanong ulit ng mga Pariseo ang dating bulag, “Ano ang masasabi mo tungkol sa kanya, dahil pinagaling ka niya?”

Sumagot ang lalaki, “Isa po siyang propeta.”

¹⁸Ngunit ayaw pa rin nilang maniwala na siya nga ang dating bulag na ngayon ay nakakakita na. Kaya ipinatawag nila ang mga magulang niya

¹⁹at tinanong, “Anak nʼyo ba ito? Totoo bang ipinanganak siyang bulag? Paano siya nakakakita ngayon?”

²⁰Sumagot ang mga magulang, “Anak nga po namin siya, at ipinanganak siyang bulag.

²¹Ngunit hindi namin alam kung paano siya nakakita at kung sino ang nagpagaling sa kanya. Siya na lang po ang tanungin ninyo. Nasa tamang edad na siya, at kaya na niyang sumagot para sa sarili niya.”

²²Ito ang sinabi ng mga magulang ng lalaki dahil sa takot sa mga pinuno ng mga Hudyo. Sapagkat napagkasunduan na ng mga pinuno ng mga Hudyo na ang sinumang kikilala kay Hesus bilang Mesias ay ititiwalag sa kanilang sinagoga.

²³Kaya ganito ang isinagot ng mga magulang: “Nasa tamang edad na siya. Siya na lang po ang tanungin ninyo.”

²⁴Kaya muli nilang ipinatawag ang dating bulag at sinabi sa kanya, “Sumumpa ka sa harap ng Diyos na sasabihin mo ang totoo! Alam naming makasalanan ang taong iyon!”

²⁵Sumagot ang lalaki, “Hindi ko po alam kung makasalanan siya o hindi. Ang alam ko lang ay dati akong bulag, pero nakakakita na ngayon.”

²⁶Tinanong pa nila ang lalaki, “Ano ang ginawa niya sa iyo? Paano ka niya pinagaling?”

²⁷Sumagot siya, “Sinabi ko na po sa inyo, ngunit ayaw naman ninyong maniwala. Bakit gusto ninyong marinig ulit ang sagot ko? Gusto rin po ba ninyong maging mga alagad niya?”

²⁸Dahil dito ay ininsulto nila ang lalaki. Sinabi nila, “Alagad ka niya, pero kami ay mga alagad ni Moises.

²⁹Alam naming nakipag-usap ang Diyos kay Moises, ngunit ang taong iyon ay hindi namin alam kung saan nanggaling!”

³⁰Sumagot ang lalaki, “Iyan nga po ang nakapagtataka. Hindi nʼyo alam kung saan siya nanggaling, pero pinagaling niya ang mata ko.

³¹Alam nating hindi pinapakinggan ng Diyos ang mga makasalanan, ngunit ang sinumang may takot sa Diyos at gumagawa ng kanyang kalooban ay pinakikinggan niya.

³²Kailanmaʼy wala pa tayong narinig na may taong nakapagpagaling ng taong ipinanganak na bulag.

³³Kung hindi nanggaling sa Diyos ang taong iyon, hindi niya magagawa ang himalang ito.”

³⁴Sumagot ang mga pinuno ng mga Hudyo, “Ipinanganak kang makasalanan! At ang lakas pa ng loob mo ngayon na pangaralan kami!” At ipinagtabuyan nila ito sa sinagoga.

Ang Espirituwal na Pagkabulag

³⁵Nabalitaan ni Hesus na pinaalis sa sinagoga ang dating bulag, kaya hinanap niya ito. At nang matagpuan niya, tinanong niya ito, “Sumasampalataya ka ba sa Anak ng Tao?”

³⁶Sumagot ang lalaki, “Sino po siya? Sabihin nʼyo po sa akin upang sumampalataya ako sa kanya.”

³⁷Sinabi ni Hesus sa kanya, “Nakita mo na siya, at siya ang kausap mo ngayon.”

³⁸Sinabi agad ng lalaki, “Panginoon, sumasampalataya po ako sa inyo.” At lumuhod siya at sumamba kay Hesus.

³⁹Sinabi ni Hesus, “Naparito ako sa mundo upang hatulan ang mga tao nang sa gayoʼy ang mga bulag ay makakita, ang mga nakakakita ay maging bulag.”[#9:39 : Wala ang mga salitang ito sa ibang mga manuskrito.]

⁴⁰Narinig ito ng ilang Pariseong naroon, at nagtanong sila, “Sinasabi mo bang mga bulag din kami?”

⁴¹Sumagot si Hesus, “Kung totoong bulag kayo, wala sana kayong kasalanan. Ngunit dahil sinasabi ninyong hindi kayo bulag, nananatili pa rin kayong may kasalanan.”