Job 27

Mga Huling Salita ni Job

¹Nagpatuloy sa pagsasalita si Job,

²“Sumusumpa ako sa Makapangyarihan

at buháy na Diyos

na nagkait ng katarungan

at nagdulot sa akin ng sama ng loob.

³Habang akoʼy may hiningang mula sa Diyos

at pinapahintulutan niyang mabuhay,

⁴hindi ako magsasalita ng masama

at kasinungalingan.

⁵Hinding-hindi ko matatanggap

na tama kayo.

Ipipilit ko pa ring wala akong kasalanan

hanggang sa aking kamatayan.

⁶Ipaglalaban kong tama ako,

at hindi ako titigil.

Malinis ang aking konsensiya

habang akoʼy nabubuhay.

⁷“Parusahan nawa ng Diyos

ang mga kumakalaban sa akin

ng parusang nararapat

sa masasamang tao!

⁸Sapagkat ano ang pag-asa

ng taong walang takot sa Diyos

kung bawiin na ng Diyos

ang kanyang buhay?

⁹Diringgin kaya ng Diyos

ang paghingi niya ng tulong

kung dumating sa kanya ang kagipitan?

¹⁰Matutuwa kaya siya

sa Diyos na Makapangyarihan?

Tatawag kaya siya sa kanya

sa lahat ng oras?

¹¹“Tuturuan ko kayo

ng tungkol sa kapangyarihan ng Diyos.

Sasabihin ko sa inyo

ang mga pamamaraan niya.

¹²Ngunit nakita na ninyo

ang lahat ng ito.

Bakit pa kayo nagsasalita

ng walang kabuluhan sa akin?

¹³“Ito ang kapalarang itinakda

ng Diyos na Makapangyarihan

sa taong masama at malupit.

¹⁴Kahit gaano kadami ang anak niya,

mamamatay ang iba sa kanila sa digmaan

at ang iba naman ay sa gutom.

¹⁵Ang matitira sa kanila

ay mamamatay sa sakit,

at walang magluluksa

sa pagkamatay nila,

kahit ang kanilang mga asawa.

¹⁶Mag-ipon man ng maraming pilak

ang masamang tao,

kahit kasindami pa ito ng alabok

at maraming damit,

na ang dami ay gabundok

¹⁷ang matutuwid

at walang kasalanan pa rin

ang magsusuot ng kanyang mga damit

at ang maghahati-hati

sa kanyang mga pilak.

¹⁸Ang itinatayo niyang bahay

ay parang sapot ng gagamba

o kayaʼy silungan ng tagapagbantay.

¹⁹Matutulog siyang mayaman

ngunit paggising niyaʼy

wala na ang kanyang kayamanan.

²⁰Darating sa kanya ang takot

na parang rumaragasang baha

at tatangayin siya ng ipuipo

pagsapit ng gabi.

²¹Tatangayin siya ng hanging

mula sa silangan

at mawawala siya sa kanyang tirahan.

²²Walang awa siyang tatangayin nito

habang pinipilit niyang makatakas.

²³May mga papalakpak

at susutsot sa kanya upang mangutya,

dahil wala na siya sa kanyang tinitirhan.”