Salmo 109

Salmo 109

¹O Diyos na aking pinapupurihan,

dinggin nʼyo ang aking panawagan!

²Dahil akoʼy pinagbibintangan

ng mga sinungaling at masasamang tao.

Nagsasalita sila ng kasinungalingan

laban sa akin.

³Sinisiraan nila ako

at sinusugod nang walang dahilan.

⁴Kahit nakikipagkaibigan ako sa kanila

ay inaakusahan pa rin nila ako,

ngunit ipinapanalangin ko pa rin sila.

⁵Sa kabutihang ginagawa ko sa kanila,

masama ang iginaganti nila.

At sa aking pag-ibig, ibinabalik nilaʼy galit.

⁶Sinasabi nila,[#109:6 : O Sinasabi ko.]

“Maghanap tayo ng masamang tao

na kakalaban sa kanya,

at magsasampa ng kaso sa hukuman laban sa kanya.

⁷At kapag hinatulan na siya,

lumabas sana na siya ang may kasalanan,

at ituring din na kasalanan ang kanyang mga panalangin.

⁸Mamatay na sana siya agad

at ibigay na lang sa iba ang katungkulan niya.

⁹At nang maulila ang kanyang mga anak

at mabiyuda ang kanyang asawa.

¹⁰Maging palaboy sana at mamalimos

ang kanyang mga anak

at palayasin sila kahit na sa kanilang ginibang tahanan.

¹¹Kunin sana ng kanyang pinagkakautangan

ang kanyang mga ari-arian,

at agawin ng mga dayuhan

ang kanyang pinaghirapan.

¹²Wala sanang maawa sa kanya

at sa mga naulila niyang mga anak

kapag siyaʼy namatay na.

¹³Mamatay sana ang kanyang mga angkan

upang silaʼy makalimutan na ng susunod na salinlahi.

^14-15Huwag sanang patawarin

at kalimutan ng Panginoon ang mga kasalanan

ng kanyang mga magulang at mga ninuno;

at lubusan na sana silang makalimutan sa mundo.

¹⁶“Dahil hindi niya naiisip na gumawa ng mabuti,

sa halip ay inuusig at pinapatay niya

ang mga dukha, ang mga nangangailangan

at ang mga nawalan ng pag-asa.

¹⁷Gustong-gusto niyang sumpain ang iba,

kaya sa kanya na lang sana mangyari

ang kanyang sinabi.

Ayaw niyang pagpalain ang iba

kaya sana hindi rin siya pagpalain.

¹⁸Walang tigil niyang isinusumpa ang iba;

parang damit na lagi niyang suot.

Bumalik sana ito sa kanya na parang tubig

na nanunuot sa kanyang katawan,

at parang langis na tumatagos

sa kanyang mga buto.

¹⁹Sanaʼy hindi na ito humiwalay sa kanya

na parang damit na bumabalot sa katawan

o sinturon na palaging nakabigkis.

²⁰Panginoon , sanaʼy maging ganyan ang inyong parusa

sa mga nagpaparatang at nagsasalita

ng masama laban sa akin.

²¹“Ngunit Makapangyarihang Panginoon ,

tulungan nʼyo ako para kayo ay maparangalan.

Iligtas nʼyo ako

dahil kayo ay mabuti at mapagmahal.

²²Dahil akoʼy dukha at nangangailangan,

at ang damdamin koʼy nasasaktan.

²³Unti-unti nang nawawala ang aking buhay.

Itoʼy parang anino na nawawala pagsapit ng gabi,

at parang balang na lumilipad

at nawawala kapag nagalaw ang dinadapuan.

²⁴Nanghihina ang mga tuhod ko

dahil sa pag-aayuno.

Akoʼy payat na payat na.

²⁵Akoʼy kinukutya ng aking mga kaaway.

Iiling-iling sila kapag akoʼy nakita.

²⁶Panginoon kong Diyos,

iligtas nʼyo ako ayon sa pag-ibig nʼyo sa akin.

²⁷At malalaman ng aking mga kaaway

na kayo Panginoon ang nagligtas sa akin.

²⁸Isinusumpa nila ako,

ngunit pinagpapala nʼyo ako.

Silaʼy mapapahiya kapag akoʼy sinalakay nila!

Ngunit akong inyong lingkod ay magagalak.

²⁹Silang nagbibintang sa akin

ay lubusan sanang mapahiya;

mabalot sana sila sa kahihiyan

tulad ng damit na tumatakip sa buong katawan.

³⁰“Pupurihin ko ang Panginoon ,

pupurihin ko siya sa harapan ng maraming tao.

³¹Dahil tinutulungan niya ang mga dukha

upang iligtas sila sa mga nais magpahamak sa kanila.”