Salmo 91

Salmo 91

¹Ang sinumang nananahan

sa piling ng Kataas-taasang Diyos

na Makapangyarihan

ay kakalingain niya.

²Ito ang masasabi ko tungkol sa Panginoon ,

“Siya ang kumakalinga

at nagtatanggol sa akin.

Siya ang aking Diyos

at sa kanya ako nagtitiwala.”

³Tiyak na ililigtas ka niya

sa bitag ng masasama

at sa mga nakamamatay na salot.

⁴Iingatan ka niya

gaya ng pag-iingat ng inahin

sa kanyang mga inakay

sa pamamagitan ng kanyang pakpak.

Ang kanyang katapatan

ang iyong magiging pananggalang

at tanggulan.

⁵At sa gabi, hindi ka matatakot

sa anumang bagay,

maging sa palaso ng mga kaaway,

kapag sumapit ang araw,

⁶o sa sakit at mga salot na dumarating

sa gabi man o araw.

⁷Kahit libu-libo pa ang mamatay

sa paligid mo,

wala pa ring masamang mangyayari saʼyo.

⁸Matutunghayan mo lamang

kung paano pinaparusahan

ang mga taong masasama.

⁹Dahil ginawa mong kanlungan ang Panginoon ,

ang Kataas-taasang Diyos na aking tagapagtanggol,

¹⁰walang kasamaan, kalamidad

o anumang salot

ang darating sa iyo o sa iyong tahanan.

¹¹Sapagkat uutusan ng Diyos

ang kanyang mga anghel

na ingatan ka saan ka man magpunta.

¹²Bubuhatin ka nila upang hindi tumama

ang iyong mga paa sa bato.

¹³Tatapakan mo ang mga leon

at mga makamandag na ahas.

¹⁴Sinabi ng Diyos,

“Ililigtas ko at iingatan ang umiibig

at kumikilala sa akin.

¹⁵Kapag tumawag siya sa akin,

sasagutin ko siya.

Sasamahan ko siya,

sa oras ng kaguluhan.

Ililigtas ko siya at pararangalan.

¹⁶Bibigyan ko siya ng mahabang buhay

at ipararanas ko sa kanya

ang aking pagliligtas.”