Salmo 92

Salmo 92

¹Kataas-taasang Diyos na Panginoon namin,

napakasarap magpasalamat

at umawit ng papuri sa inyo.

²Napakasarap ipahayag

ang inyong pag-ibig at katapatan,

araw at gabi,

³habang tumutugtog ng mga instrumentong

may kuwerdas.

⁴Sapagkat pinasaya nʼyo ako, Panginoon ,

sa pamamagitan ng inyong

mga kahanga-hangang gawa.

At dahil dito, akoʼy umaawit sa tuwa.

⁵O Panginoon , kay dakila ng inyong mga gawa.

Hindi namin kayang unawain.

⁶Hindi maunawaan ng mga hangal at matitigas ang ulo

⁷na kahit umunlad ang taong masama

gaya ng damong lumalago,

ang kahahantungan pa din niya

ay walang hanggang kapahamakan.

⁸Ngunit kayo, Panginoon ,

ay dakila sa lahat magpakailanman.

⁹Tiyak na mapapahamak

ang lahat ng inyong kaaway

at kakalat ang lahat

ng gumagawa ng masama.

¹⁰Pinalakas nʼyo ako na

tulad ng lakas ng toro

at binigyan nʼyo rin ako ng kagalakan.

¹¹Nasaksihan ko ang pagkatalo

ng aking mga kaaway,

at narinig ko ang pagdaing ng masasamang kumakalaban sa akin.

¹²Uunlad ang buhay ng mga matuwid

gaya ng mga palma,

at tatatag na parang puno ng sedro

na tumutubo sa Lebanon.

¹³Para silang mga punong itinanim sa templo ng Panginoon na ating Diyos,

na tumutubo nang mayabong,

¹⁴lumalago at namumunga

kahit matanda na,

berdeng-berde ang mga dahon

at nananatiling matatag.

¹⁵Ipinapakita lamang nito na ang Panginoon ,

ang aking Batong kanlungan, ay matuwid.

Sa kanyaʼy walang anumang

kalikuan na matatagpuan.