Mga Awit 61

Panalangin Upang Ingatan ng Diyos

¹Dinggin mo, O Diyos, ang aking dalangin;

inyo pong pakinggan, ang aking hinaing!

²Tumatawag ako dahilan sa lumbay,

sapagkat malayo ako sa tahanan.

Iligtas mo ako, ako ay ingatan,

³pagkat ikaw, O Diyos, ang aking kanlungan,

matibay na muog laban sa kaaway.

⁴Sa inyo pong tolda, ako ay payagan na doon tumira habang nabubuhay;

sa lilim ng iyong bagwis na malakas, ingatan mo ako nang gayo'y maligtas. (Selah)

⁵Lahat kong pangako, O Diyos, iyong alam

at abâ mong lingkod, tunay na binigyan ng mga pamana na iyong inilaan sa nagpaparangal sa iyong pangalan.

⁶Ang buhay ng hari sana'y pahabain;

bayaang ang buhay niya'y patagalin!

⁷Paghahari niya sa iyong harapan, sana'y magpatuloy habang nabubuhay;

kaya naman siya ay iyong lukuban ng iyong pag-ibig na walang kapantay.

⁸At kung magkagayon, kita'y aawitan,

ako'y maghahandog sa iyo araw-araw.