¹Бе же человек от фарисей, никодим имя ему, князь жидовский:

²сей прииде ко Иисусу нощию и рече ему: равви, вем, яко от Бога пришел еси учитель: никтоже бо может знамений сих творити, яже ты твориши, аще не будет Бог с ним.

³Отвеща Иисус и рече ему: аминь, аминь глаголю тебе: аще кто не родится свыше, не может видети Царствия Божия.

⁴Глагола к нему никодим: како может человек родитися стар сый? еда может второе внити во утробу матере своея и родитися?

⁵Отвеща Иисус: аминь, аминь глаголю тебе: аще кто не родится водою и Духом, не может внити во Царствие Божие:

⁶рожденное от плоти плоть есть, и рожденное от Духа дух есть.

⁷Не дивися, яко рех ти: подобает вам родитися свыше.

⁸Дух, идеже хощет, дышет, и глас его слышиши, но не веси, откуду приходит и камо идет: тако есть всяк (человек) рожденный от Духа.

⁹Отвеща никодим и рече ему: како могут сия быти?

¹⁰Отвеща Иисус и рече ему: ты еси учитель израилев, и сих ли не веси?

¹¹Аминь, аминь глаголю тебе, яко, еже вемы, глаголем, и еже видехом, свидетелствуем, и свидетелства нашего не приемлете:

¹²аще земная рекох вам, и не веруете: како, аще реку вам небесная, уверуете?

¹³И никтоже взыде на небо, токмо сшедый с небесе Сын Человеческий, сый на небеси:

¹⁴и якоже моисей вознесе змию в пустыни, тако подобает вознестися Сыну Человеческому,

¹⁵да всяк веруяй в онь не погибнет, но имать живот вечный.

¹⁶Тако бо возлюби Бог мир, яко и Сына своего единороднаго дал есть, да всяк веруяй в онь не погибнет, но имать живот вечный.

¹⁷Не посла бо Бог Сына своего в мир, да судит мирови, но да спасется им мир.

¹⁸Веруяй в онь не будет осужден: а не веруяй уже осужден есть, яко не верова во имя единороднаго Сына Божия.

¹⁹Сей же есть суд, яко свет прииде в мир, и возлюбиша человецы паче тму, неже свет: беша бо их дела зла.

²⁰Всяк бо делаяй злая ненавидит света и не приходит к свету, да не обличатся дела его, яко лукава суть:

²¹творяй же истину грядет к свету, да явятся дела его, яко о Бозе суть соделана.

²²По сих (же) прииде Иисус и ученицы его в жидовскую землю: и ту живяше с ними и крещаше.

²³Бе же иоанн крестя во еноне близ салима, яко воды многи бяху ту: и прихождаху и крещахуся:

²⁴не у бо бе всажден в темницу иоанн.

²⁵Бысть же стязание от ученик иоанновых со иудеи о очищении:

²⁶и приидоша ко иоанну и рекоша ему: равви, иже бе с тобою об он пол иордана, емуже ты свидетелствовал еси, се, сей крещает, и вси грядут к нему.

²⁷Отвеща иоанн и рече: не может человек приимати ничесоже, аще не будет дано ему с небесе.

²⁸Вы сами мне свидетелствуете, яко рех: несмь аз Христос, но яко послан есмь пред ним.

²⁹Имеяй невесту жених есть: а друг женихов, стоя и послушая его, радостию радуется за глас женихов: сия убо радость моя исполнися:

³⁰оному подобает расти, мне же малитися.

³¹Грядый свыше над всеми есть: сый от земли от земли есть и от земли глаголет: грядый с небесе над всеми есть,

³²и еже виде и слыша, сие свидетелствует: и свидетелства его никтоже приемлет.

³³Приемый его свидетелство верова, яко Бог истинен есть.

³⁴Егоже бо посла Бог, глаголголы Божия глаголет: не в меру бо Бог дает Духа.

³⁵Отец (бо) любит Сына и вся даде в руце его.

³⁶Веруяй в Сына имать живот вечный: а иже не верует в Сына, не узрит живота, но гнев Божий пребывает на нем.