¹Что убо речем авраама отца нашего обрести по плоти?

²Аще бо авраам от дел оправдася, имать похвалу, но не у Бога.

³Что бо писание глаголет? верова же авраам Богови, и вменися ему в правду.

⁴Делающему же мзда не вменяется по благодати, но по долгу:

⁵а не делающему, верующему же во оправдающаго нечестива, вменяется вера его в правду.

⁶Якоже и давид глаголет блаженство человека, емуже вменяет Бог правду, без дел закона:

⁷блажени, ихже отпустишася беззакония и ихже прикрышася греси:

⁸блажен муж, емуже не вменит Господь греха.

⁹Блаженство убо сие на обрезание ли, или на необрезание? Глаголем бо, яко вменися аврааму вера в правду.

¹⁰Како убо вменися ему, во обрезании ли сущу, или в необрезании, не во обрезании, но в необрезании.

¹¹И знамение прият обрезания, печать правды веры, яже в необрезании. Яко быти ему отцу всех верующих в необрезании, во еже вменитися и тем в правду.

¹²и отцу обрезания, не сущым точию от обрезания, но и ходящым в стопах веры, яже (бе) в необрезании отца нашего авраама.

¹³Не законом бо обетование аврааму, или семени его, еже быти ему наследнику мирови, но правдою веры.

¹⁴Аще бо сущии от закона наследницы, испразднися вера, и разорися обетование:

¹⁵закон бо гнев соделовает: идеже бо несть закона, (ту) ни преступления.

¹⁶Сего ради от веры, да по благодати, во еже быти известну обетованию всему семени, не точию сущему от закона, но и сущему от веры авраамовы, иже есть отец всем нам,

¹⁷якоже есть писано: яко отца многим языком положих тя, прямо Богу, емуже верова, животворящему мертвыя и нарицающу не сущая яко сущая.

¹⁸Иже паче упования во упование верова, во еже быти ему отцу многим языком, по реченному: тако будет семя твое.

¹⁹И не изнемог верою, ни усмотри своея плоти уже умерщвленныя, столетен негде сый, и мертвости ложесн сарриных:

²⁰во обетовании же Божии не усумнеся неверованием, но возможе верою, дав славу Богови

²¹и известен быв, яко, еже обеща, силен есть и сотворити.

²²Темже и вменися ему в правду.

²³Не писано же бысть за того единаго точию, яко вменися ему,

²⁴но и за ны, имже хощет вменитися, верующым в воскресившаго Иисуса Христа Господа нашего из мертвых,

²⁵иже предан бысть за прегрешения наша и воста за оправдание наше.