Mungu atawaadhibu maadui zake

¹Karibieni mkasikilize enyi mataifa,

tegeni sikio enyi watu.

Sikiliza ee dunia na vyote vilivyomo,

ulimwengu na vyote vitokavyo humo!

²Mwenyezi-Mungu ameyakasirikia mataifa yote,

ameghadhabika dhidi ya majeshi yao yote.

Ameyapangia mwisho wao,

ameyatoa yaangamizwe.

³Maiti zao zitatupwa nje;

harufu ya maiti zao itasambaa;

milima itatiririka damu yao.

⁴Jeshi lote la angani litaharibika,[#34:4 Taz Mat 24:29; Marko 13:25; Luka 21:26; Ufu 6:13-14]

anga zitakunjamana kama karatasi.

Jeshi lake lote litanyauka,

kama majani ya mzabibu yanyaukavyo,

naam, kama tunda la mtini linyaukavyo.

⁵Upanga wa Mungu uko tayari juu mbinguni.[#34:5-17 Taz Isa 63:1-6; Yer 49:7-22; Eze 25:12-14; 35:1-15; Amo 1:11-12; Oba]

Tazama, washuka kuwaadhibu Waedomu,

watu ambao ameamua kuwaangamiza.

⁶Upanga utalowa damu na kutapakaa mafuta,

kama kwa damu ya kondoo na mbuzi,

na mafuta ya figo za kondoo dume.

Maana Mwenyezi-Mungu atatoa kafara huko Bosra,

kutakuwa na mauaji makubwa nchini Edomu.

⁷Nyati wataangamia pamoja nao,

ndama kadhalika na mafahali.

Nchi italoweshwa damu,

udongo utarutubika kwa mafuta yao.

⁸Maana Mwenyezi-Mungu anayo siku ya kisasi;

mwaka wa kulipiza maadui wa Siyoni.

⁹Vijito vya Edomu vitatiririka lami,

udongo wake utakuwa madini ya kiberiti;

ardhi yake itakuwa lami iwakayo.

¹⁰Itawaka usiku na mchana bila kuzimika,[#34:10 Taz Ufu 14:11; 19:3]

moshi wake utafuka juu milele.

Nchi itakuwa jangwa siku zote,

hakuna atakayepitia huko milele.

¹¹Itakuwa makao ya kozi na nungunungu,

bundi na kunguru wataishi humo.

Mwenyezi-Mungu atawaletea ghasia,

na timazi la fujo kwa wakuu wake.

¹²Nchi itaitwa “Nchi bila Mfalme;”

wakuu wake wote wametoweka.

¹³Miiba itaota katika ngome zake,

viwavi na michongoma mabomani mwao.

Itakuwa makao ya mbwamwitu, maskani yao mbuni.

¹⁴Pakamwitu na fisi watakuwa humo,

majini yataitana humo;

kwao usiku utakuwa mwanga,

na humo watapata mahali pa kupumzikia.

¹⁵Humo bundi watataga mayai na kuyaatamia,

wataangua vifaranga na kuviweka kivulini mwao.

Humo vipanga watakutania,

kila mmoja na mwenzake.

¹⁶Someni katika kitabu cha Mwenyezi-Mungu:

“Hakuna hata kiumbe kimoja kitakachokosekana,

kila kimoja kitakuwako na mwenzake.”

Maana Mwenyezi-Mungu mwenyewe ametamka hivyo,

roho yake itawakusanya hao wote.

¹⁷Mwenyezi-Mungu amepanga sehemu ya kila mmoja wao,

ametumia kamba kuwapimia nchi hiyo;

wataimiliki milele na milele,

wataishi humo kizazi hata kizazi.