¹Maono ya Obadia. Mambo aliyosema Bwana Mwenyezi-Mungu kuhusu taifa la Edomu.[#Taz Isa 34:5-17; Yer 49:7-22; Eze 25:12-14; 35:1-15; Amo 1:11-12; Mal 1:2-5]

Mwenyezi-Mungu ataadhibu Edomu

Tumepata habari kutoka kwa Mwenyezi-Mungu;

mjumbe ametumwa kati ya mataifa:

“Inukeni! Twende tukapigane na Edomu!”

²Mwenyezi-Mungu aliambia taifa la Edomu:

“Nitakufanya mdogo miongoni mwa mataifa,

utadharauliwa kabisa na wote.

³Kiburi chako kimekudanganya:

Kwa kuwa mji wako mkuu ni ngome ya miamba imara

na makao yako yapo juu milimani,

hivyo wajisemea,

‘Nani awezaye kunishusha chini?’

⁴Hata ukiruka juu kama tai,

ukafanya makao yako kati ya nyota,

mimi nitakushusha chini tu.

Nasema mimi Mwenyezi-Mungu.

⁵“Kama wezi au wanyang'anyi wangekujia usiku,

je, wasingechukua tu kiasi cha kuwatosha?

Ikiwa wavunaji zabibu wangekujia,

je, wasingekuachia kiasi kidogo tu?

Lakini wewe, adui zako wamekuangamiza kabisa.

⁶Enyi wazawa wa Esau, mali zenu zimetekwa;

hazina zenu zote zimeporwa!

⁷Washirika wenzenu wamewadanganya,

wamewafukuza nchini mwenu.

Mliopatana nao wamewashinda vitani,

rafiki wa kutegemewa ndio waliokutegea mitego,

nawe hukuelewa yaliyokuwa yanatendeka.

⁸Mimi Mwenyezi-Mungu nakuuliza hivi:

Je, siku hiyo, sitawaangamiza wenye hekima kutoka Edomu

na wenye maarifa kutoka mlima Esau?

⁹Ewe Temani, mashujaa wako watatishika

na kila mtu atauawa mlimani Esau.

Sababu za Edomu kuadhibiwa

¹⁰“Kwa sababu ya matendo maovu

mliyowatendea ndugu zenu wazawa wa Yakobo,

mtaaibishwa na kuangamizwa milele.

¹¹Siku ile mlisimama kando mkitazama tu,

wakati wageni walipopora utajiri wao,

naam, wageni walipoingia malango yao

na kugawana utajiri wa Yerusalemu kwa kura.

Kwa hiyo nanyi mlitenda kama wazawa wao.

¹²Msingalifurahia siku hiyo ndugu zenu walipokumbwa na mikasa;

msingaliwacheka Wayuda

na kuona fahari wakati walipoangamizwa;

msingalijigamba wenzenu walipokuwa wanataabika.

¹³Msingeliingia katika mji wa watu wangu,

siku walipokumbwa na maafa;

msingelipora mali zao, siku hiyo ya maafa yao.

¹⁴Msingelisimama kwenye njia panda

na kuwakamata wakimbizi wao;

wala msingeliwakabidhi kwa adui zao

wale waliobaki hai.

Mungu atayahukumu mataifa

¹⁵“Siku inakaribia ambapo mimi Mwenyezi-Mungu

nitayahukumu mataifa yote.

Kama mlivyowatendea wengine, ndivyo mtakavyotendewa,

mtalipwa kulingana na matendo yenu.

¹⁶Maana, kama walivyokunywa kikombe cha ghadhabu yangu

kwenye mlima wangu mtakatifu

ndivyo na mataifa jirani yatakavyokunywa;

watakunywa na kupepesuka,

wataangamia kana kwamba hawakuwahi kuwapo duniani.

Waisraeli watashinda

¹⁷“Lakini mlimani Siyoni watakuwapo wale waliosalimika

nao utakuwa mlima mtakatifu.

Wazawa wa Yakobo wataimiliki tena nchi iliyokuwa yao.

¹⁸Wazawa wa Yakobo watakuwa kama moto

na wazawa wa Yosefu kama miali ya moto.

Watawaangamiza wazawa wa Esau

kama vile moto uteketezavyo mabua makavu,

asinusurike hata mmoja wao.

Mimi, Mwenyezi-Mungu, nimesema.

¹⁹Wale wanaokaa Negebu wataumiliki mlima Esau;

wale wanaokaa Shefela wataimiliki nchi ya Wafilisti.

Waisraeli watamiliki nchi za Efraimu na Samaria

na watu wa Benyamini wataimiliki nchi ya Gileadi.

²⁰Waisraeli walio uhamishoni Hala

wataimiliki Foinike hadi Sarepta.

Watu wa Yerusalemu walio uhamishoni Sefaradi

wataimiliki miji ya Negebu.

²¹Waokoaji watapanda juu ya mlima Siyoni

ili kuutawala mlima Esau;

naye Mwenyezi-Mungu atakuwa ndiye Mfalme.”