Mwongozo mzuri wa mfalme

¹Utenzi wangu kuhusu uaminifu na haki;

ninauimba kwa heshima yako, ee Mwenyezi-Mungu.

²Nitazingatia mwenendo usio na hatia.

Je, utakuja kwangu lini?

Nitaishi kwa unyofu nyumbani kwangu;

³sitavumilia kamwe upuuzi.

Nayachukia matendo ya watu wapotovu,

mambo yao hayataambatana nami.

⁴Upotovu wowote ule uwe mbali nami;

sitahusika kabisa na uovu.

⁵Anayemsengenya jirani nitamfutilia mbali;

sitamvumilia mwenye majivuno na kiburi.

⁶Nitawaangalia kwa wema watu walio waaminifu,

wapate kuishi pamoja nami.

Watu wanyofu ndio watakaonitumikia.

⁷Mwongo yeyote hatakaa nyumbani mwangu;

hakuna msema uongo atakayekaa kwangu.

⁸Siku kwa siku nitawaangamiza waovu wote nchini;

nitawaangamiza wabaya wote mjini mwa Mwenyezi-Mungu.