Hamu ya kuwa pamoja na Mungu

¹Ee Mungu, wewe u Mungu wangu,

nami nakutafuta kwa moyo;

roho yangu inakutamani kama mtu mwenye kiu;

nina kiu kama nchi kavu isiyo na maji.

²Nimetaka kukuona patakatifuni pako,

niione nguvu yako na utukufu wako.

³Fadhili zako ni bora kuliko maisha,

nami nitakusifu kwa mdomo wangu.

⁴Nitakushukuru maisha yangu yote;

nitainua mikono yangu na kukuomba.

⁵Roho yangu inafurahi kama kwa karamu na vinono;

kwa shangwe nitaimba sifa zako.

⁶Niwapo kitandani ninakukumbuka,

usiku kucha ninakufikiria;

⁷maana wewe umenisaidia daima.

Kivulini mwa mabawa yako nitashangilia.

⁸Roho yangu inaambatana nawe kabisa,

mkono wako wa kulia wanitegemeza.

⁹Lakini hao wanaotaka kuyaangamiza maisha yangu,

watatumbukia chini kwenye makao ya wafu.

¹⁰Watauawa kwa upanga,

watakuwa chakula cha mbweha.

¹¹Lakini mfalme atafurahi kwa sababu ya Mungu;

wanaoahidi kwa jina la Mungu watamsifu,

lakini vinywa vya waongo vitafumbwa.