¹Laiti ungekuwa kaka yangu,

ambaye amenyonyeshwa na mama yangu!

Hivyo, hata kama ningekutana nawe nje,

ningekubusu na hakuna ambaye angenidharau.

²Ningekuongoza na kukufikisha nyumbani kwa mama mzazi,

mahali ambapo ungenifundisha upendo.

Ningekupa divai nzuri iliyokolezwa,

ningekupa divai yangu ya makomamanga yangu.

³Mkono wako wa kushoto u chini ya kichwa changu,

na mkono wako wa kulia wanikumbatia.

⁴Nawasihini, enyi wanawake wa Yerusalemu,

msiyachochee wala kuyaamsha mapenzi,

hadi hapo wakati wake utakapofika.

Shairi la sita

Wanawake

⁵Ni nani huyu ajaye kutoka mbugani,

huku anamwegemea mpenzi wake?

Bibi arusi

Chini ya mtofaa, mimi nilikuamsha,

pale ambapo mama yako aliona uchungu,

naam, pale ambapo mama yako alikuzaa.

⁶Nipige kama mhuri moyoni mwako,

naam, kama mhuri mikononi mwako.

Maana pendo lina nguvu kama kifo,

wivu nao ni mkatili kama kaburi.

Mlipuko wake ni kama mlipuko wa moto,

huwaka kama mwali wa moto.

⁷Maji mengi hayawezi kamwe kulizima,

mafuriko hayawezi kulizamisha.

Mtu akijaribu kununua pendo,

akalitolea mali yake yote,

atakachopata ni dharau tupu.

Ndugu za Bibi arusi

⁸Tunaye dada mdogo,

ambaye bado hajaota matiti.

Je, tumfanyie nini dada yetu

siku atakapoposwa?

⁹Kama angalikuwa ukuta,

tungalimjengea mnara wa fedha;

na kama angalikuwa mlango,

tungalimhifadhi kwa mbao za mierezi.

Bibi arusi

¹⁰Mimi nalikuwa ukuta,

na matiti yangu kama minara yake.

Machoni pake nalikuwa

kama mwenye kuleta amani.

Bwana arusi

¹¹Solomoni alikuwa ana shamba la mizabibu,

mahali paitwapo Baal-hamoni.

Alilikodisha kwa walinzi;

kila mmoja wao alilipa vipande elfu vya fedha.

¹²Shamba langu la mizabibu ni shamba langu mwenyewe,

naam, ni shamba langu binafsi!

Basi, Solomoni, wewe ukae na elfu zako za fedha,

na kila mlinzi wa matunda akae na mia mbili zake.

¹³Ewe uliye shambani,

rafiki zangu wanasikiliza sauti yako;

hebu nami niisikie tafadhali!

Bibi arusi

¹⁴Njoo haraka ewe mpenzi wangu,

kama paa au mwanapaa dume juu ya milima ya manukato.