¹Ukitaka kutenda wema chagua mtu wa kumtendea;

nawe utapata shukrani kwa wema wako.

²Mtendee wema mcha Mungu nawe utatuzwa;

utatuzwa na mtu huyo, au hakika na Mungu Mkuu.

³Hakuna jema litakalomjia mtu anayedumu katika uovu,

au mtu ambaye anakataa kutoa zaka.

⁴Wape msaada watu wamchao Mungu,

lakini usiwasaidie wenye dhambi.

⁵Watendee wema watu wanyenyekevu

lakini usiwape kitu wasiomcha Mungu.

Usiwape chakula chochote kile,

la sivyo watakitumia kukuangusha;

nawe, ukalipwa uovu maradufu

kwa wema uliowatendea hao.

⁶Hata Mungu Mkuu huwachukia wenye dhambi,

naye atawaadhibu hao wasiomcha Mungu.

⁷Mpe msaada mtu mwema,

lakini usimsaidie mwenye dhambi.

⁸Rafiki haonekani wakati wa fanaka;

na katika shida hutakosa kumjua adui ni nani.

⁹Mtu anapofanikiwa maadui zake huhuzunika,

lakini katika shida hata rafiki yake hujitenga naye.

¹⁰Kamwe usimwamini adui;

uovu wake uko kama kutu ya shaba.

¹¹Hata kama ananyenyekea na kuinama mbele yako

jichunge na kuchukua tahadhari dhidi yake.

Yeye ni kama kioo kinachopata kutu

kama huendelei kukisafisha.

¹²Usimweke adui karibu nawe,

la sivyo atakupindua na kuchukua mahali pako.

Usimkalishe kwenye mkono wako wa kulia

la sivyo, atachukua kiti chako cha heshima;

na mwishowe utatambua ukweli wa maneno yangu,

nawe utajuta kutokana na hayo niliyosema.

¹³Mchezea nyoka akiumwa hahurumiwi na mtu yeyote!

Kadhalika na mtu anayewakaribia wanyama wakali!

¹⁴Hivyo, hakuna amhurumiaye anayeshiriki na wenye dhambi

na kujihusisha na dhambi zake.

¹⁵Mwenye dhambi atakaa nawe kwa kitambo tu,

lakini ukipatwa na matatizo atakukimbia.

¹⁶Adui ataongea nawe maneno matamu,

lakini moyoni mwake atapanga kukutupa shimoni.

Adui atatoa machozi mengimengi,

lakini akipata nafasi, atatimiza haja yake ya kukuua.

¹⁷Ukipatwa na maafa utamkuta hapo anakungojea,

akijidai kwamba anakusaidia, atakutegea kukumaliza.

¹⁸Atatikisa kichwa na kupiga makofi;

atanongoneza mengi na kuwa mtu mwingine kabisa.