¹Ndivyo afanyavyo mtu anayemcha Bwana;

mtu ashikaye sheria zake atampata Hekima.

²Hekima atakuja kumlaki kama mama,

atamkaribisha kama bibi arusi wake.

³Atamlisha chakula cha maarifa,

atamnywesha maji ya Hekima.

⁴Mtu huyo atamwegemea hekima na hataanguka;

atamtegemea na hataaibishwa.

⁵Hekima atamtukuza juu ya jirani zake;

na katikati ya mkutano atamwezesha kusema.

⁶Mtu huyo atapata furaha na fahari ya shangwe,

na jina lake kukumbukwa daima.

⁷Lakini wapumbavu hawawezi kumpata Hekima

wenye dhambi hawatamwona.

⁸Hekima yu mbali na wenye kiburi,

na waongo hawataweza kamwe kumfikiria.

⁹Mwenye dhambi hafai kuimba nyimbo za sifa,

maana hajapelekewa kutoka kwa Bwana.

¹⁰Nyimbo za sifa yabidi ziimbwe kwa hekima,

hapo Bwana atazifanikisha.

Kuchagua kwa hiari

¹¹Usiseme: “Bwana ndiye aliyesababisha nianguke”,

maana yeye hawezi kusababisha jambo analochukia.

¹²Usiseme: “Yeye ndiye aliyenipotosha”,

maana yeye hahitaji msaada wa mwenye dhambi.

¹³Bwana anayachukia machukizo yote;

hata wale wanaomcha wanayachukia hayo.

¹⁴Bwana ndiye aliyemwumba binadamu mwanzoni,

akampa uwezo wa kujiamulia mambo yake mwenyewe.

¹⁵Ukitaka, unaweza kuzitii amri,

kuishi kwa uaminifu au la, ni chaguo lako.

¹⁶Bwana ameweka mbele yako moto na maji:

Nyosha mkono wako, ujichukulie upendacho.

¹⁷Binadamu amewekewa mbele yake uhai na kifo;

kile atakachochagua atapewa.

¹⁸Maana hekima ya Bwana ni kuu.

Yeye ni mwenye nguvu na anaona yote.

¹⁹Bwana huwaangalia kwa wema wale wanaomcha;

yeye anajua kila kitu afanyacho binadamu.

²⁰Yeye hajamwamuru yeyote kutomcha Mungu,

wala hajamruhusu mtu yeyote kutenda dhambi.