Uaminifu kwa Mungu

¹Mwanangu, ukienda kumtumikia Bwana,

uwe tayari kupata majaribu.

²Uwe mnyofu wa moyo na nia moja;

na usihangaike wakati wa taabu.

³Ambatana na Bwana wala usimwache kamwe,

nawe utafanikiwa mwishoni mwa maisha yako.

⁴Uyapokee yote yatakayokupata,

hata ukiaibishwa uwe na uvumilivu,

⁵maana dhahabu hujaribiwa kwa moto

na watu wanaokubaliwa na Mungu kwa tanuri ya aibu.

⁶Mtegemee Mungu, naye atakusaidia,

shika njia nyofu na kumtumaini yeye.

⁷Enyi mnaomcha Bwana ngojeni huruma yake,

msigeuke upande, msije mkaanguka.

⁸Enyi mnaomcha Bwana, mtumainini yeye,

nanyi hamtakosa tuzo lenu.

⁹Enyi mnaomcha Bwana muwe na tumaini la fanaka;

mtazamie kupata furaha ya milele na huruma.

¹⁰Fikirini juu ya vizazi vilivyopita mkajiulize:

“Nani aliyepata kumtegemea Bwana, akaaibika?

Nani aliyedumu katika kumcha Bwana, akaachwa naye?

Nani aliyemwomba Bwana, akasahauliwa naye?

¹¹Maana Bwana ni mpole na mwenye huruma.

Yeye husamehe watu dhambi

na kuokoa wakati wa shida.

¹²“Ole wake mtu asiye imara moyoni na anayelegalega!

Ole wake mwenye dhambi anayefuata njia mbili!

¹³Ole wake mtu aliye mwoga moyoni asiye na tumaini!

Mtu wa namna hiyo hatalindwa.

¹⁴Ole wenu nyinyi mliopoteza matumaini yenu;

mtafanya nini Mungu atakapofika kuwaadhibu?

¹⁵Wanaomcha Bwana hawaachi kamwe kutii maneno yake;

wale wanaompenda huzifuata njia zake.

¹⁶Wanaomcha Bwana hutafuta kumpendeza,

wale wanaompenda huzingatia sheria yake.

¹⁷Wanaomcha Bwana wako tayari daima kumtumikia,

Wao hunyenyekea mbele yake na kusema:

¹⁸Tujiweke mikononi mwa Bwana

na sio mikononi mwa watu ambao hufa.

Maana kama ulivyo ukuu wake

ndivyo pia huruma yake.”