¹Ee Bwana, Baba na Mtawala wa maisha yangu,

usiniache niangamizwe na maneno yangu,

wala usikubali nifanye makosa kwa sababu yake!

²Laiti mawazo yangu yangechapwa fimbo,

na moyo wangu ungefunzwa nidhamu ya busara.

Hapo singeachwa kukosolewa makosa yangu,

na dhambi yangu yoyote kuadhibiwa;

³ili makosa yangu yasiongezeke zaidi,

na dhambi zangu zisiwe nyingi.

Hapo sitaanguka mikononi mwa maadui zangu;

maadui zangu hawatafurahi dhidi yangu.

⁴Ee Bwana, Baba na Mtawala wa maisha yangu,

nakuomba nisiwe na majivuno.

⁵Nakuomba uniondolee tamaa mbaya.

⁶Usiruhusu niwe mchoyo au niwe na tamaa mbaya.

Usiniache kutawaliwa na tamaa hizo mbaya.

Kuapa

⁷Wanangu, sikilizeni mafunzo kuhusu kusema vizuri;

mtu atakayefuata hayo hatanaswa mitegoni.

⁸Mwenye dhambi hukamatwa kwa maneno yake,

wafidhuli na wenye kiburi hunaswa nayo.

⁹Usiuzoeshe mdomo wako kuapa,

wala kuzoea kutaja jina la Mungu Mtakatifu.

¹⁰Maana kama mtumishi anayechunguliwa sana,

naye hatakosa kuchapwa viboko,

vivyo hivyo anayeapa daima kwa kutaja jina la Mungu,

hakika hataepukana na dhambi.

¹¹Mtu anayeapa kwa wingi amejaa uovu,

na majanga hayatatoka nyumbani kwake.

Akikiuka kiapo chake atakuwa na hatia;

na akikidharau atakuwa na hatia maradufu.

Kama ameapa bure hatafikiriwa kuwa hana kosa,

hata hivyo ni mkosaji tu, ataadhibiwa;

na nyumbani kwake kutakuwa na maafa daima.

Mazungumzo machafu

¹²Kuna namna ya kusema ambayo ni kama kifo.

Hiyo na isiwepo kamwe katika wazawa wa Yakobo.

Wamchao Mungu watayaepa makosa hayo yote

hawatagaagaa katika dhambi.

¹³Usiuzoeshe mdomo wako kusema machafu,

maana kusema hivyo kunahusika na dhambi.

¹⁴Unapoketi miongoni mwa wakuu

kumbuka baba yako na mama yako,

usije ukawasahau mbele ya hao wakuu,

ukaonekana kuwa mpumbavu kwa tabia yako.

Hapo utatamani kuwa heri usingelizaliwa

na kuilaani siku ile ulipozaliwa.

¹⁵Mtu aliyezoea kutumia lugha chafu

kamwe hatakuwa na nidhamu maishani.

Zinaa

¹⁶Watu wa namna mbili hurudiarudia dhambi,

na namna ya tatu husababisha ghadhabu ya Mungu.

Mtu anawaka tamaa kama moto

na hawezi kupoa mpaka imezimwa.

Mtu anakuwa na tamaa kuzini na mwili wake mwenyewe

na hataacha mpaka yeye mwenyewe ameteketezwa.

¹⁷Kwa mzinzi, kila cha kula ni kitamu,

hatachoka nacho mpaka amekufa!

¹⁸Mtu anavunja nadhiri yake ya ndoa

na kujisemea: “Nani ananiona?

Giza limenizunguka na ukuta umenificha!

Hakuna mtu anayeniona,

ya nini niogope?

Mungu Mkuu hataona dhambi yangu!”

¹⁹Woga wa mtu huyo ni kwa watu tu.

Hajui kuwa macho ya Bwana ni maangavu mara elfu kumi kuliko jua.

Yanaziona njia zote za binadamu,

hata zile sehemu zote zilizofichika.

²⁰Kabla ulimwengu haujaumbwa, ulijulikana kwake;

hata baada ya ulimwengu kumalizika kuumbwa.

²¹Mtu huyo ataadhibiwa mji wote ukitazama,

atakamatwa wakati ambapo hatazamii kabisa.

²²Ndivyo ilivyo pia kwa mwanamke anayemwacha mumewe,

akazaa watoto na mwanamume mwingine.

²³Kwanza, mwanamke huyo amekaidi sheria ya Mungu Mkuu;

pili, amefanya kosa dhidi ya mumewe;

na tatu, amefanya uzinzi kwa umalaya wake,

akazaa watoto kwa mwanamume mwingine.

²⁴Yeye mwenyewe ataletwa mbele ya baraza,

na atakabiliwa na adhabu kuhusu watoto wake.

²⁵Watoto wake hawatadumu imara,

chipukizi hao wake hawatakuwa na matunda.

²⁶Ataacha duniani kumbukumbu la laana;

aibu aliyoifanya haitafutwa kamwe.

²⁷Wale watakaoachwa hai baada yake

watatambua kuwa hakuna lililo bora kuliko kumcha Bwana,

na hakuna kilicho kitamu kuliko kutii amri za Bwana.