Malezi

¹Mzazi ampendaye mwanawe, atamrudi mara kwa mara,

ili amwonee fahari jinsi atakavyokua.

²Amfunzaye mwanawe nidhamu,

baadaye atafaidika naye.

Atajivunia mwanawe mbele ya wanaofahamiana naye.

³Anayemfundisha mwanawe atawafanya maadui zake waone wivu,

na kujivunia mwanawe mbele ya rafiki zake.

⁴Hata kama baba yake amekufa atakuwa kama hakufa,

maana ameacha nyuma mtoto anayefanana naye.

⁵Baba alipokuwa hai alifurahi kuwa pamoja naye,

na akifa hana haja ya kusikitika.

⁶Baba amemwacha nyuma atakayelipiza kisasi maadui zake,

na atakayelipa wema wa rafiki zake.

⁷Anayemharibu mwanawe, atakuwa na kazi ya kufunga vidonda,

na kwa kila kilio moyo wake utashtuka.

⁸Farasi aliyezoezwa vibaya atakuwa mkaidi,

na mtoto asiyefunzwa nidhamu atageuka kuwa mkaidi.

⁹Mbembeleze sana mtoto naye atakutisha,

chezacheza naye, naye atakusikitisha.

¹⁰Usichekecheke naye kama hupendi kulia naye baadaye;

matokeo yake mwishoni itakuwa kusaga meno.

¹¹Usimruhusu kufanya apendavyo alipo bado mtoto,

na wala usiache kumkosoa anapokosa.

¹²Mfanye awe na utii angali bado mtoto,

mtandike wakati alipo bado kijana;

la sivyo, atakuwa mkaidi na kuacha kukutii,

na kukuhuzunisha mno rohoni.

¹³Mfunze mwanao nidhamu na kuwa mvumilivu,

ili usije ukaaibishwa na aibu yake.

Afya

¹⁴Afadhali maskini mwenye afya na nguvu mwilini,

kuliko tajiri anayeteseka mwilini mwake.

¹⁵Afya na nguvu ni bora kuliko dhahabu;

mwili wenye nguvu ni bora kuliko utajiri mwingi.

¹⁶Hakuna utajiri ulio bora kuliko afya ya mwili,

na hakuna furaha iliyo bora kuliko furaha ya moyoni.

¹⁷Afadhali kifo kuliko maisha ya taabu,

na pumziko la milele kuliko ugonjwa wa kudumu.

¹⁸Kumpa chakula bora mtu asiyeweza kula

ni kama kuweka chakula juu ya kaburi:

¹⁹Je, sadaka yafaa nini kwa sanamu

ambayo haiwezi kula wala kunusa?

Hivyo ndivyo alivyo mtu anayeteswa na Bwana.

²⁰Mtu huyo huona kwa macho yake na kuguna,

kama towashi anayemkumbatia msichana na kuguna.

Furaha na huzuni

²¹Usijiachilie kupata huzuni,

wala usijiumize mwenyewe kwa makusudi.

²²Furaha ya moyo ni uhai wa mtu;

furaha ndiyo inayompa maisha marefu.

²³Jifurahishe na kuwa na utulivu wa moyo;

weka huzuni mbali nawe.

Maana huzuni imewaangamiza wengi,

wala haina faida kwa mtu yeyote.

²⁴Wivu na hasira hufupisha maisha,

mahangaiko humfanya mtu azeeke upesi.

²⁵Mwenye moyo mkunjufu na mwema,

atachukua hadhari juu ya chakula anachokula.