Yosia

¹Kumkumbuka Yosia ni kama mchanganyiko wa ubani,

ambao umechanganywa na fundi stadi,

ni mtamu kama asali kwa kila mtu,

ni kama muziki kwenye karamu ya pombe.

²Aliongozwa sawa kuwaongoa watu,

akayangolea mbali machukizo yao ya uovu.

³Alikuwa mwaminifu kabisa kwa Bwana!

Wakati watu walipokuwa waovu,

yeye aliimarisha utendaji wa mema.

Yeremia

⁴Isipokuwa Daudi, Hezekia na Yosia,

wafalme wengine walitenda dhambi sana,

maana waliiacha sheria ya Mungu Mkuu,

wafalme wa Yuda, mpaka wa mwisho.

⁵Uwezo wao waliwaachia watu wengine,

na heshima yao wakawapa taifa la kigeni

⁶ambalo liliuteketeza kwa moto mji mteule wa hekalu,

likaiacha mitaa yake kuwa mitupu,

kulingana na neno la Yeremia.

⁷Maana walimtesa Yeremia,

ingawa alikuwa amewekwa wakfu kuwa nabii kabla ya kuzaliwa,

angoe, aharibu na kuangamiza,

na pia ajenge tena na kupanda.

Ezekieli

⁸Ezekieli ndiye aliyeona maono ya utukufu,

ambayo Mungu alimwonesha juu ya gari la viumbe wenye mabawa.

⁹Maana Mungu aliwakumbuka maadui zake kwa tufani,

lakini akawatendea mema wale walioishi maisha yao vizuri.

Manabii kumi na wawili

¹⁰Mifupa ya manabii kumi na wawili na iimarike huko kaburini;

maana waliwatia moyo watu wa Yakobo,

na kuwakomboa kwa kuwapa tumaini thabiti.

Zerubabeli na Yoshua

¹¹Tutamsifu Zerubabeli namna gani?

Yeye alikuwa pete ya mhuri katika mkono wa kulia!

¹²Kadhalika na Yoshua mwana wa Yozadaki.

Wakati wao, walijenga madhabahu,

na kusimika hekalu takatifu

ambalo utukufu wake wadumu milele.

Nehemia

¹³Ukumbusho wa Nehemia ni wa kudumu.

Yeye alitujengea tena kuta zilizoanguka,

akasimika tena malango na mifumo,

na kujenga upya nyumba zilizoharibiwa.

Wazee wa kale

¹⁴Duniani hakuna aliyeumbwa kama Henoki alivyokuwa,

maana yeye alichukuliwa kutoka duniani.

¹⁵Na pia hakuna mtu aliyezaliwa duniani kama Yosefu alivyokuwa;

na mifupa yake inatunzwa.

¹⁶Shemu na Sethi waliheshimiwa na watu wao,

naye Adamu anaheshimika kuliko viumbe vyote hai duniani.