Watoto wa Mungu

¹Oneni, basi, jinsi Baba alivyotupenda mno hata tunaitwa watoto wa Mungu! Na kweli, ndivyo tulivyo. Ndiyo maana ulimwengu haututambui sisi, kwani haumjui Mungu.

²Wapenzi wangu, sisi ni watoto wa Mungu sasa, lakini bado haijaonekana wazi jinsi tutakavyokuwa. Lakini tunajua kwamba, wakati Kristo atakapotokea, tutafanana naye kwani tutamwona vile alivyo.

³Basi, kila mtu aliye na tumaini hili katika Kristo, hujiweka safi kama vile Kristo alivyo safi kabisa.[#3:3 Maana yake hali isiyochafuliwa na dhambi (wazo kuu katika 3:4-10).]

⁴Kila mtu atendaye dhambi anavunja sheria ya Mungu, maana dhambi ni uvunjaji wa sheria.[#3:4 Kama vile katika 2Thes 2:3-8; neno hilo linachukua maana ya pekee hapa na laweza kutafsiriwa pia kwa neno: Uovu kwa maana ya upinzani kamili dhidi ya Mungu nyakati za mwisho.]

⁵Mnajua kwamba Kristo alikuja kuziondoa dhambi zetu, na kwamba kwake hamna dhambi yoyote.[#3:5 Yoh 1:29; ling 1Pet 2:24.; #3:5 Yoh 8:46; 1Pet 2:22; ling 2Kor 5:21; Ebr 4:15; 7:26.]

⁶Basi, kila aishiye katika muungano na Kristo hatendi dhambi; lakini kila mtu atendaye dhambi hakupata kamwe kumwona wala kumjua Kristo.[#3:6 Kinachosemwa hapa ni matokeo ya mambo yaliyotajwa katika aya zilizotangulia: Kule kuungana na Kristo hakuwezi kabisa kuendana na dhambi. Ling aya 9 na pia Rom 6:1-14.]

⁷Basi, watoto wangu, msikubali kupotoshwa na mtu yeyote. Mtu atendaye matendo maadilifu ni mwadilifu kama vile Kristo alivyo mwadilifu kabisa.

⁸Lakini atendaye dhambi ni wa Ibilisi, maana Ibilisi ametenda dhambi tangu mwanzo. Lakini Mwana wa Mungu alikuja duniani kuiharibu kazi ya Ibilisi.[#3:8 Yoh 8:44; maneno tangu mwanzo yamkini yanaeleweka kulingana na matumizi ya 3:12 ambapo yule Mwovu ndiye aliyemwongoza Kaini kumwua nduguye; au, tangu mwanzo kwa maana ya wakati Mungu alipoumba vema vitu vyote.; #3:8 Ebr 2:14.]

⁹Kila aliye mtoto wa Mungu hatendi dhambi, maana anayo hali ya kimungu ndani yake; hawezi kutenda dhambi kwa sababu yeye ni mtoto wa Mungu.[#3:9 Tafsiri ya neno la Kigiriki lenye maana ya kawaida ya “mbegu” lakini hapa au ni hali yake Mungu au ni Roho wa Mungu (taz 2:27; 3:24; 4:13; Yoh 3:5-8; 14:16-17 kuhusu nafasi na matokeo ya Roho wa Mungu ndani ya mwaamini). Katika 5:18 kisa cha mwaamini kutotenda dhambi ni kwa vile “Mwana wa Mungu hutulinda salama”. Kwa vyovyote hali yake Mungu yahusika au kwa njia ya Mwanawe au kwa Roho wake.]

¹⁰Lakini yeyote asiyetenda mambo maadilifu, au asiyempenda ndugu yake, huyo si mtoto wa Mungu. Hiyo ndiyo tofauti iliyoko kati ya watoto wa Mungu na watoto wa Ibilisi.

Pendaneni

¹¹Na, ujumbe mliousikia tangu mwanzo ndio huu: Tunapaswa kupendana![#3:11 Yoh 13:34; 15:12; ling 1Yoh 2:7-11; 3:18,23; 4:7-12; 4:20-5:2.]

¹²Tusiwe kama Kaini ambaye, kwa kuongozwa na yule Mwovu, alimuua ndugu yake. Na, kwa nini alimuua? Kwa sababu matendo yake yalikuwa maovu, lakini yale ya ndugu yake yalikuwa mema!

¹³Basi, ndugu zangu, msishangae kama ulimwengu unawachukia nyinyi.[#3:13 Yoh 15:18-25; 17:14. Na, kuhusu matumizi ya “ulimwengu” hapa taz 2:15.]

¹⁴Sisi tunajua kwamba tumekwisha pita kutoka katika kifo na kuingia katika uhai kwa sababu tunawapenda ndugu zetu. Mtu asiye na upendo hubaki katika kifo.

¹⁵Kila anayemchukia ndugu yake ni muuaji; nanyi mnajua kwamba muuaji yeyote yule hana uhai wa milele ndani yake.[#3:15 Linga Mat 5:21-22.]

¹⁶Sisi tumepata kujua upendo ni nini, kwani Kristo aliyatoa maisha yake kwa ajili yetu. Nasi vilevile tunapaswa kuyatoa maisha yetu kwa ajili ya ndugu zetu.[#3:16 Yoh 10:11; 15:13; ling Gal 2:20. Kuhusu kumwiga Yesu taz 1:7 maelezo.]

¹⁷Basi, mtu akiwa na mali za hapa duniani, halafu akamwona ndugu yake ana shida, lakini akawa na moyo mgumu bila kumwonea huruma, anawezaje kusema kwamba anampenda Mungu?

¹⁸Watoto wangu, upendo wetu usiwe maneno matupu, bali uwe upendo wa kweli na wa vitendo.

Uthabiti wetu mbele ya Mungu

¹⁹Hivyo ndivyo tuwezavyo kuwa na hakika kwamba sisi ni watu wa ukweli; na hatutakuwa na wasiwasi mbele ya Mungu.

²⁰Kwa maana, hata kama dhamiri zetu zatuhukumu, twajua kwamba Mungu ni mkuu kuliko dhamiri, na kwamba yeye ajua kila kitu.[#3:20 Yaonekana kwamba aya hii ngumu ina lengo la kuwahakikishia waumini wasife moyo kwani Mungu ni mkuu kuliko mioyo yetu inayotuhukumu naye aweza kusamehe na anajua kila kitu.]

²¹Wapenzi wangu, kama dhamiri zetu hazina lawama juu yetu, basi, twaweza kuwa na uthabiti mbele ya Mungu,

²²na kupokea kwake chochote tunachoomba, maana tunazitii amri zake na kufanya yale yanayompendeza.

²³Na, amri yake ndiyo hii: Kumwamini Mwanae Yesu Kristo, na kupendana kama alivyotuamuru.[#3:23 Yoh 13:34; 15:12,17.]

²⁴Anayezitii amri za Mungu anaishi katika muungano na Mungu na Mungu anaishi katika muungano naye. Kwa njia ya Roho ambaye Mungu ametujalia, sisi twajua kwamba Mungu anaishi katika muungano nasi.