Kuishi katika mwanga

¹Kwa hiyo, mwigeni Mungu, maana nyinyi ni watoto wake wapenzi.[#5:1 Mat 5:48. “Mwigeni Mungu”, yamkini katika kusamehe (4:32) na kupenda (5:2).]

²Upendo uongoze maisha yenu kama vile Kristo alivyotupenda, na kwa ajili yetu akajitoa mwenyewe kama tambiko yenye harufu nzuri na sadaka impendezayo Mungu.[#5:2 Maneno ya sehemu ya pili ya aya hii yanagusia kifo cha Yesu Kristo kwa kutumia maneno yaleyale yaliyotumiwa katika A.K. kuhusu kafara; rejea Kut 29:18 na pia taz Fil 4:18; Ebr 10:10.]

³Kwa vile nyinyi ni watu wa Mungu, basi uasherati, uchafu wowote ule au choyo visitajwe kamwe miongoni mwenu.[#5:3 Aya hii karibu ni sambamba na Kol 3:5 ambapo pia vitendo hivyo vitatu visivyofaa vinatajwa.]

⁴Tena maneno ya aibu, ya upuuzi au ubishi, yote hayo hayafai kwenu; maneno ya kumshukuru Mungu ndiyo yanayofaa.

⁵Jueni wazi kwamba mwasherati yeyote au mchafu au mchoyo, (ambao ni sawa na kuabudu sanamu), au mtu yeyote wa aina hiyo hataambulia chochote katika ufalme wa Kristo na wa Mungu.[#5:5 Kol 3:5. Mwandishi anaona ulafi ni sawa na kuabudu sanamu kwa vile mtu mlafi nafasi ya Mungu imechukuliwa na hivyo vitu anavyotamani kujishibisha navyo.]

⁶Msikubali kudanganywa na mtu kwa maneno matupu; maana, kwa sababu ya mambo kama hayo ghadhabu ya Mungu huwajia wote wasiomtii.

⁷Basi, msishirikiane nao.

⁸Zamani nyinyi mlikuwa gizani, lakini sasa nyinyi mko katika mwanga kwa kuungana na Bwana. Ishini kama watoto wa mwanga,[#5:8 Yoh 12:35 maelezo.]

⁹maana matokeo ya mwanga ni wema kamili, uadilifu na ukweli.[#5:9 Baadhi ya hati za kale zina “matokeo ya Roho”.]

¹⁰Jaribuni kujua yale yanayompendeza Bwana.

¹¹Msishiriki katika matendo yasiyofaa ya giza, bali yafichueni.

¹²Mambo yanayotendwa kwa siri ni aibu hata kuyataja.

¹³Lakini kila kitu kikifichuliwa na mwanga, ukweli wake hudhihirishwa;

¹⁴na kila kilichodhihirishwa huwa mwanga. Ndiyo maana Maandiko yasema:

“Amka wewe uliyelala,

fufuka kutoka kwa wafu,

naye Kristo atakuangaza.”

¹⁵Basi, muwe waangalifu jinsi mnavyoishi. Msiishi kama wapumbavu, bali kama wenye hekima.

¹⁶Tumieni vizuri muda mlio nao maana siku hizi ni mbaya.

¹⁷Kwa hiyo, msiwe wapumbavu, bali jaribuni kujua matakwa ya Bwana.

¹⁸Acheni kulewa divai maana hiyo itawaangamiza, bali mjazwe Roho Mtakatifu.

¹⁹Zungumzeni kwa maneno ya Zaburi, nyimbo na tenzi za kiroho; mwimbieni Bwana nyimbo na Zaburi kwa shukrani mioyoni mwenu.

²⁰Mshukuruni Mungu Baba daima kwa ajili ya yote, kwa jina la Bwana wetu Yesu Kristo.

Wake na waume

²¹Kila mmoja amstahi mwenzake kwa sababu ya heshima mliyo nayo kwa Kristo.[#5:21—6:9 Kol 3:18—4:1; 1Pet 2:18-37. Kuanzia 5:21 mpaka 6:9 mwandishi anazungumzia juu ya uhusiano katika familia ya Kikristo: wake na waume (6:5-9); watoto na wazazi (6:1-4); watumwa na mabwana zao (6:5-9). Ni dhahiri kwamba yanayosemwa yanaendana na desturi za wakati huo lakini yamebadilishwa kiasi fulani kutokana na fikra za Kikristo.; #5:21 Kinachosemwa katika aya hii ni muhimu kwa uhusiano wote utakaotajwa katika 5:21—6:9. Muungano kati ya Kristo na Kanisa lake unaipa jumuiya yote ya Wakristo mtazamo mpya kuhusu uhusiano uliopo kati ya tabaka mbalimbali. Katika tafsiri hii, kitenzi “kustahi” yaani kuheshimu, kimetumika kutafsiri neno la Kigiriki ambalo lina maana ya kujiweka chini ya mtu fulani, kumfikiria yeye kwanza. Tafsiri nyingine za Kiswahili zina: Kunyenyekeana.]

²²Wake wawatii waume zao kama kumtii Bwana.

²³Maana mume anayo mamlaka juu ya mkewe, kama vile Kristo alivyo na mamlaka juu ya kanisa; naye Kristo mwenyewe hulikomboa kanisa, mwili wake.[#5:23-24 Rejea 1Kor 11:3. Hapa picha ya Kanisa kama mwili ambao kichwa chake ni Kristo inatumika pamoja na picha ya Kanisa kama mchumba wa Kristo (rejea aya 23-33). Uhusiano wa Kristo na Kanisa unachukuliwa kama kielelezo kizuri cha uhusiano kati ya mke na mume (aya 25-29). Zaidi ya hayo, inaonekana kwamba mwandishi anataka kuwawekea wafuasi wa Yesu picha ile ile ya Yesu ya kujitoa kwa ajili yao ili iwe ni mwongozo wa uhusiano miongoni mwao.]

²⁴Kama vile kanisa linavyomtii Kristo, vivyo hivyo, wake wawatii waume zao katika mambo yote.

²⁵Nanyi waume, wapendeni wake zenu kama Kristo alivyolipenda kanisa, akajitoa mwenyewe sadaka kwa ajili yake.

²⁶Alifanya hivyo ili kwa neno lake, aliweke wakfu kwa Mungu, baada ya kulifanya safi kwa kuliosha katika maji,[#5:26 Hapa kuna matumizi ya maneno ambayo ni vigumu kufuata. Kadiri ya wafafanuzi wa Maandiko kuna matumizi ya mfano kutokana na desturi ya huko Mashariki ya Kati wakati huo ambapo bibi arusi alifanywa safi kwa ajili ya bwana arusi. Kwa hivyo maneno “baada ya kulifanya safi kwa kuliosha katika maji” ni maneno ya kimfano, kuonesha jinsi Yesu anavyoliweka wakfu kanisa lake na kulitakasa kwa neno lake (rejea Yoh 15:3). Taz pia Tito 3:5; 1Pet 3:21.]

²⁷kusudi ajipatie kanisa lililo takatifu na safi kabisa, kanisa lisilo na doa, kasoro au chochote cha namna hiyo.

²⁸Basi, waume wanapaswa kuwapenda wake zao kama miili yao wenyewe. (

²⁹Hakuna mtu yeyote auchukiaye mwili wake; badala ya kuuchukia, huulisha na kuuvika. Ndivyo naye Kristo anavyolitunza kanisa,

³⁰maana sisi ni viungo vya mwili wake).

³¹“Kwa sababu hiyo, mwanamume atamwacha baba yake na mama yake, ataungana na mkewe, nao wawili watakuwa mwili mmoja.”

³²Kuna ukweli uliofichika katika maneno haya, nami naona kwamba yamhusu Kristo na kanisa lake.

³³Lakini yanawahusu nyinyi pia: kila mume lazima ampende mkewe kama nafsi yake mwenyewe, naye mke anapaswa kumstahi mumewe.