Sarai na Hagari

¹Basi, Sarai, mkewe Abramu, alikuwa bado hajamzalia mumewe mtoto. Lakini alikuwa na mjakazi aliyeitwa Hagari, kutoka Misri.

²Basi, Sarai akamwambia Abramu, “Unajua kuwa Mwenyezi-Mungu hajanijalia kupata watoto. Mchukue Hagari mjakazi wangu; huenda nikapata watoto kwake.” Abramu akakubali shauri la Sarai.[#16:2 Kadiri ya fikira za wakati huo, kwa mwanamke kutoweza kupata mtoto ilikuwa balaa kubwa kwa mwanamke huyo (rejea 1Sam 1:10-11). Kwa kupunguza balaa hiyo mwanamke tasa aliweza hata kumwambia mumewe alale na mtumwa wake wa kike na mtoto atakayepatikana atamtambua kama wake yeye mwenyewe. Rejea Mwa 30:1-13.]

³Kisha, Sarai akampa Abramu Hagari, mjakazi wake ambaye alikuwa Mmisri, awe mke wake. Haya yalitokea baada ya Abramu kukaa katika nchi ya Kanaani kwa muda wa miaka kumi.

⁴Abramu akamchukua Hagari, naye Hagari akapata mimba. Lakini mara tu alipoona amepata mimba, Hagari akaanza kumdharau bimkubwa wake.

⁵Sarai akamwambia Abramu, “Wewe utawajibika kwa ubaya ninaotendewa. Mimi nilikupa mjakazi wangu, lakini alipopata mimba, mimi nimekuwa duni machoni pake! Mwenyezi-Mungu na ahukumu kati yako na mimi!”

⁶Lakini Abramu akamwambia Sarai, “Mjakazi wako yuko chini ya mamlaka yako; mfanyie upendavyo.” Basi, Sarai akamtesa Hagari mpaka akatoroka.

Ishmaeli anazaliwa

⁷Malaika wa Mwenyezi-Mungu akamkuta Hagari penye chemchemi ya maji jangwani, chemchemi iliyoko njiani kuelekea Shuri.[#16:7 Hapa ni dhahiri kwamba maneno “Malaika wa Mwenyezi-Mungu” si nafsi nyingine ila Mungu mwenyewe anayejidhihirisha na kufanya kuweko kwake kuweze kuonekana kwa namna fulani kwa macho. Taz Kut 3:2 maelezo; 23:20-33 maelezo; 32:34 na pia Amu 6:11-24.]

⁸Malaika akamwuliza, “Hagari, mjakazi wa Sarai! Unatoka wapi na unakwenda wapi?” Hagari akamjibu, “Namkimbia bimkubwa wangu Sarai.”

⁹Yule malaika wa Mwenyezi-Mungu akamwambia, “Rudi kwa bimkubwa wako Sarai na umtii.”

¹⁰Zaidi ya hayo, malaika wa Mwenyezi-Mungu akamwambia Hagari, “Nitawazidisha wazawa wako hata wasiweze kuhesabika kwa wingi wao.”

¹¹Kisha huyo malaika wa Mwenyezi-Mungu akamwambia, “Wewe ni mjamzito na utajifungua mtoto wa kiume; utamwita Ishmaeli, maana Mwenyezi-Mungu amesikia mateso yako.[#16:11 Katika Kiebrania jina hili lina maana ya “Mungu husikia” au, “Mungu na asikie”.]

¹²Ishmaeli ataishi kama pundamwitu; atakuwa adui wa kila mtu na kila mtu atakuwa adui yake. Ataishi akiwa adui wa jamaa yake.”[#16:12 Aya hii inaeleza mazingira na namna ya kuishi ya mabedui wa jangwani kusini mwa Palestina. Rejea Mwa 25:16-18.]

¹³Basi, Hagari akampa jina Mwenyezi-Mungu aliyezungumza naye huko, “Wewe ni Mungu Aonaye,” kwa maana alifikiri, “Kweli hapa nimemwona yeye anionaye!”[#16:13 Kiebrania ni “El Roi”.]

¹⁴Ndiyo maana kile kisima chaitwa Beer-lahai-roi. Kisima hiki kipo kati ya Kadeshi na Beredi.[#16:14 Maana yake “Kisima cha Yule Aishiye na Aonaye”.; #16:14 Taz Hes 13:26 maelezo.]

¹⁵Hagari akamzalia Abramu mtoto wa kiume. Abramu akamwita mtoto huyo Ishmaeli.

¹⁶Abramu alikuwa na umri wa miaka 86 wakati Hagari alipomzaa Ishmaeli.