Yakobo anahamia Betheli

¹Siku moja, Mungu alimwambia Yakobo, “Anza safari, uende kuishi Betheli na kunijengea humo mahali pa kunitambikia mimi Mungu niliyekutokea wakati ulipomkimbia kaka yako Esau.”

²Basi, Yakobo akawaambia jamaa yake na wote aliokuwa nao, “Tupilieni mbali sanamu za miungu ya kigeni mlizo nazo, mjitakase na kubadili mavazi yenu.[#35:2 Wito huu wa kujitakasa na kutupilia mbali miungu ya kigeni ni kitendo cha kujitayarisha kwa ibada inayotangazwa katika aya 3 (rejea Kut 19:10-11). Kutaja miungu ya kigeni hapa huenda kunamaanisha kwamba Raheli alikuwa bado anashikilia vile vinyago vya miungu ya jamaa yake (taz Mwa 31:19 maelezo).]

³Kisha, tutakwenda Betheli ili nimjengee mahali pa kumtambikia Mungu aliyenisaidia siku ya taabu, Mungu ambaye amekuwa nami popote nilipokwenda.”

⁴Basi, wakampa Yakobo sanamu zote za miungu ya kigeni walizokuwa nazo pamoja na vipuli walivyokuwa wamevaa masikioni; naye akavifukia chini ya mwaloni uliokuwa karibu na Shekemu.[#35:4 Hivi huenda vilikuwa hirizi ambazo zilihusiana na kupiga ramli.; #35:4 Taz Mwa 12:6 maelezo.]

⁵Yakobo na wanawe walipokuwa wanasafiri, Mungu aliwatia hofu wenyeji wa miji yote ya jirani hata hawakuthubutu kuwafuatia.

⁶Basi, Yakobo akawasili Luzu yaani Betheli katika nchi ya Kanaani, pamoja na watu wote aliokuwa nao.

⁷Akajenga hapo madhabahu na kupaita El-betheli kwani hapo ndipo mahali Mungu alipojionesha kwake wakati alipokuwa akimkimbia kaka yake.[#35:7 Maana ya jina hili ni “Mungu wa Betheli”.]

⁸Debora, mlezi wa Rebeka, alifariki, akazikwa chini ya mwaloni upande wa kusini wa Betheli. Kwa hiyo Yakobo akauita mji huo Alon-bakuthi.[#35:8 Maana yake ni “Mwaloni wa maombolezo”.]

⁹Baada ya Yakobo kurudi kutoka Padan-aramu, Mungu alimtokea tena na kumbariki.

¹⁰Mungu alimwambia, “Jina lako ni Yakobo, lakini hutaitwa hivyo tena, bali sasa jina lako litakuwa Israeli.” Kwa hiyo Yakobo akaitwa Israeli.[#35:10 Taz Mwa 32:28 maelezo.]

¹¹Tena Mungu akamwambia, “Mimi ndimi Mungu mwenye nguvu. Ujaliwe wazawa wengi; kwako wewe kutatokea taifa, mataifa na wafalme.[#35:11 Taz Mwa 17:1 maelezo.]

¹²Nchi niliyowapa Abrahamu na Isaka, nitakupa wewe na wazawa wako.”

¹³Basi, baada ya kuongea na Yakobo, Mungu akamwacha na kupanda juu.

¹⁴Yakobo akasimika nguzo ya jiwe la ukumbusho mahali hapo Mungu alipozungumza naye, akaiweka wakfu kwa kuimiminia tambiko ya kinywaji na mafuta.

¹⁵Basi, Yakobo akapaita mahali hapo alipozungumza na Mungu Betheli.

Kuzaliwa kwa Benyamini na kifo cha Raheli

¹⁶Yakobo na jamaa yake yote waliendelea na safari yao kutoka Betheli. Walipokuwa umbali fulani kabla ya kufika Efratha, Raheli akashikwa na uchungu mkali wa kuzaa.

¹⁷Naye alipokuwa katika uchungu huo, mkunga akamwambia, “Usiogope, umepata mtoto mwingine wa kiume.”

¹⁸Raheli huku akikata roho, akampa huyo mtoto jina Ben-oni. Lakini baba yake akamwita mtoto huyo Benyamini.[#35:18 Katika Kiebrania jina hili linatamkika kama maneno yenye maana ya “mwana wa huzuni yangu”.; #35:18 Jina hili maana yake ni “mwana wa upande wa kulia” yaani upande wa “bahati” au, “upendeleo” na hivyo “mwana aliyependelewa”.]

¹⁹Basi, Raheli akafariki na kuzikwa kando ya njia iendayo Efratha (yaani Bethlehemu).

²⁰Yakobo akasimika nguzo ya kumbukumbu juu ya kaburi la Raheli ambayo ipo mpaka leo.

²¹Israeli akaendelea na safari yake na kupiga kambi yake baada ya kuupita mnara wa Ederi.

²²Wakati Israeli alipokuwa anakaa nchini humo, mwanawe Reubeni, alilala na Bilha, suria wa baba yake; naye Israeli akasikia habari hizo.

Wana wa Yakobo

Yakobo alikuwa na watoto wa kiume kumi na wawili.

²³Wana wa Lea walikuwa Reubeni, mzaliwa wa kwanza wa Yakobo, Simeoni, Lawi, Yuda, Isakari na Zebuluni.

²⁴Watoto wa kiume wa Raheli walikuwa Yosefu na Benyamini.

²⁵Watoto wa kiume waliozaliwa na Bilha, mjakazi wa Raheli, walikuwa Dani na Naftali.

²⁶Na watoto wa kiume waliozaliwa na Zilpa, mjakazi wa Lea, walikuwa Gadi na Asheri. Hao ndio watoto wa kiume wa Yakobo, aliowazaa alipokuwa kule Padan-aramu.

Kifo cha Isaka

²⁷Yakobo aliondoka akaenda Mamre kwa baba yake Isaka, huko Kiriath-arba, yaani Hebroni, mahali ambapo Abrahamu na Isaka walikaa kama wageni.

²⁸Isaka alikuwa na miaka 180

²⁹akafariki akiwa mzee wa miaka mingi. Watoto wake, Esau na Yakobo wakamzika.