Wajumbe kutoka Babuloni

¹Wakati huo, mfalme Merodak-baladani mwana wa Baladani, mfalme wa Babuloni, aliposikia kwamba Hezekia alikuwa ameugua na sasa amepona, alimtumia ujumbe pamoja na zawadi.[#39:1-2 Taz 2Fal 20:12. Mfalme huyu alitawala huko Babuloni tangu mwaka 721 hadi 710 K.K. Huenda kufika kwa wajumbe wake Yerusalemu kulikuwa na shabaha ya kumwomba mfalme Hezekia msaada dhidi ya Ashuru. Jina “Merodak-baladani” ni Kiebrania cha jina la Kibabuloni “Marduk-apalidini” maana yake ni “Marduki” (mungu) amepata mtoto.]

²Basi, Hezekia aliwakaribisha na kuwaonesha nyumba ya hazina: fedha, dhahabu, viungo vya kukolezea chakula, mafuta ya thamani, vifaa vyake vyote vya kijeshi na vitu vyote vilivyokuwamo katika bohari zake. Hakuna chochote katika ikulu yake au katika nchi yake ambacho hakuwaonesha.

³Ndipo nabii Isaya alipokwenda kwa mfalme Hezekia na kumwuliza, “Watu hawa wamesema nini? Na, wamekujia kutoka wapi?” Naye Hezekia akamjibu “Wamenijia kutoka nchi ya mbali, huko Babuloni.”

⁴Halafu Isaya akamwuliza, “Wameona nini katika ikulu yako?” Hezekia akamjibu, “Wameona yote yaliyomo katika ikulu yangu. Hakuna chochote katika bohari zangu ambacho sikuwaonesha.”

⁵Ndipo Isaya akamwambia Hezekia, “Sikia neno la Mwenyezi-Mungu wa majeshi:[#39:5-7 Baadhi ya wafafanuzi wa Maandiko Matakatifu wanahusisha tangazo hili na kuwekwa jela kwa Manase, mwanawe Hezekia, kule Babuloni, tukio linalosimuliwa katika 2Nya 33:10-13; lakini lawezekana linahusu kuchukuliwa Waisraeli wengi uhamishoni chini ya mfalme Nebukadneza (2Fal 24:10—25:17).]

⁶Tazama, siku zinakuja ambapo vyote vilivyomo nyumbani mwako na vitu vyote walivyokusanya wazee wako hadi leo, vitapelekwa mpaka Babuloni. Hakuna kitu chochote kitakachobaki; ndivyo asemavyo Mwenyezi-Mungu.

⁷Tena baadhi ya watoto wako mwenyewe wa kiume watapelekwa mateka nao watakuwa matowashi katika ikulu ya mfalme wa Babuloni.”

⁸Naye Hezekia akamwambia Isaya, “Neno la Mwenyezi-Mungu ulilosema ni sawa.” Alisema hivyo kwani alifikiri, “Kutakuwa na amani na usalama muda wote niishipo.”