¹Anayetafuta yake tu hujitenga na wenzake;

hukasirika akipewa shauri lolote jema.

²Mpumbavu hapendezwi na busara;

kwake cha maana ni maoni yake tu.

³Ajapo mwovu huja pia dharau;

pamoja na aibu huja fedheha.

⁴Maneno yaweza kuwa chemchemi ya hekima;[#18:4 Kama methali hiyo ikichukuliwa hapa kwa maana iliyoko katika 13:14 ni dhahiri kwamba yanafaa kwa maisha. Sura hii inalipa suala la kuongea nafasi yake: maneno ya mpumbavu (18:6-8,13); nguvu ya maneno (18:20-21).]

yenye kilindi kama bahari, kama kijito kinachobubujika.

⁵Si vizuri kumpendelea mtu mwovu,[#18:5 Methali hii inahusu maamuzi katika mahakama (taz Meth 17:15; rejea Lawi 19:15; Kumb 1:17; Yobu 13:7-8; Meth 24:23; Isa 5:23).]

na kumnyima haki mtu mwadilifu.

⁶Maneno ya mpumbavu huleta ugomvi;

kila anachosema husababisha adhabu.

⁷Kinywa cha mpumbavu humwangamiza mwenyewe;

mdomo wake ni mtego wa kumnasa yeye mwenyewe.

⁸Maneno ya msengenyaji ni kama kitoweo kitamu;[#18:8 Rejea Meth 26:22. Taz pia 10:8-14 maelezo.]

ambacho hushuka moja kwa moja mpaka tumboni.

⁹Mtu mvivu kazini mwake

ni ndugu yake mharibifu.

¹⁰Jina la Mwenyezi-Mungu ni mnara imara;[#18:10 Mwenyezi-Mungu mara kwa mara husemwa kuwa ni ngome, au mnara wa kuwakinga watu (Zab 18:1-2; 91:2). Lakini matajiri wanafikiri utajiri wao ni usalama wao (Meth 18:11).]

mwadilifu huukimbilia akawa salama.

¹¹Lakini tajiri hudhani mali ni ngome yake;

anafikiri hayo ni ukuta mrefu unaomlinda.

¹²Majivuno ya moyoni huleta maangamizi,[#18:12 Kuhusu yawapatao wenye tabia hiyo rejea Meth 16:18.]

lakini unyenyekevu huleta heshima.

¹³Kujibu kabla ya kusikiliza

ni upumbavu na jambo la aibu.

¹⁴Roho ya mtu huweza kustahimili ugonjwa,

lakini ukiwa umevunjika moyo, utastahimilije?

¹⁵Mtu mwenye akili hujipatia maarifa,

sikio la mwenye busara hutafuta maarifa.

¹⁶Zawadi humfungulia mtu milango;

huweza kumfikisha mtu mbele ya mkuu.

¹⁷Ajiteteaye kwanza huonekana msema kweli,

mpaka hapo mpinzani wake atakapoanza kumhoji.

¹⁸Kura hukomesha ubishi;

huamua kati ya wakuu wanaopingana.

¹⁹Ndugu aliyeudhiwa ni mgumu kuliko mji wa ngome;

magomvi hubana kama makufuli ya ngome.

²⁰Maneno ya mtu yaweza kumshibisha;

hutosheka kwa matokeo ya maneno yake.

²¹Ulimi una nguvu ya kufanya hai na kuua;

wanaopenda kuutumia watakula matunda yake.

²²Anayempata mke amepata bahati njema;[#18:22 Kuhusu mke kama zawadi kutoka kwa Mungu taz 19:14b.]

hiyo ni fadhili kutoka kwa Mwenyezi-Mungu.

²³Maskini huomba kwa unyenyekevu,

bali tajiri hujibu kwa ukali.

²⁴Marafiki wengi waweza kumwangusha mtu,

lakini wapo marafiki waaminifu kuliko ndugu.