¹Heshima apewayo mpumbavu haimfai;

ni kama theluji ya kiangazi,

au mvua ya wakati wa mavuno.

²Kama shomoro au mbayuwayu wasiotua,

kadhalika laana asiyostahili mtu haimtui.

³Mjeledi kwa farasi, lijamu kwa punda,

na fimbo kwa mgongo wa mpumbavu.

⁴Usimjibu mpumbavu kipumbavu,

usije ukafanana naye.

⁵Mjibu mpumbavu kama ustahilivyo upumbavu wake,

asije akajiona kuwa mwenye hekima zaidi.

⁶Kumtuma mpumbavu ujumbe,

ni kama kujikata miguu au kujitafutia shida.

⁷Methali mdomoni mwa mpumbavu,

ni kama miguu ya kiwete inayoning'inia.

⁸Kumpa mpumbavu heshima,

ni kama kufunga jiwe kwenye kombeo.

⁹Mpumbavu anayejaribu kutumia methali,

ni kama mlevi anayejaribu kung'oa mwiba mkononi.

¹⁰Mtu amwajiriye mpumbavu au mlevi,

ni kama mpiga upinde anayejeruhi kila mtu.

¹¹Mpumbavu anayerudiarudia upumbavu wake,

ni kama mbwa anayekula matapishi yake.

¹²Wamwona mtu ajionaye kuwa mwenye hekima?

Nakuambia mpumbavu ni nafuu kuliko huyo.

¹³Mvivu husema: “Huko nje kuna simba;

siwezi kwenda huko.”

¹⁴Kama vile mlango uzungukiapo bawaba zake,

ndivyo mvivu juu ya kitanda chake.

¹⁵Mvivu huutia mkono wake katika sahani ya chakula,

lakini hawezi kuuinua hadi mdomoni.

¹⁶Mvivu hujiona kuwa mwenye hekima

kuliko watu saba wawezao kujibu kwa busara.

¹⁷Ajiingizaye katika ugomvi usiomhusu,

ni kama mtu amshikaye masikio mbwa anayepita.

¹⁸Kama mwendawazimu achezeavyo mienge,

au mishale ya kifo,

¹⁹ndivyo alivyo mtu ampotoshaye jirani,

kisha aseme, “Nilikuwa natania tu!”

²⁰Bila kuni, moto huzimika;

bila mchochezi, ugomvi humalizika.

²¹Kama vile makaa au kuni huchochea moto,

ndivyo mgomvi achocheavyo ugomvi.

²²Maneno ya msengenyaji ni kama kitoweo;

hushuka mpaka ndani kabisa tumboni.

²³Kama rangi angavu iliyopakwa kigae,

ndivyo yalivyo maneno matamu yenye nia mbaya.

²⁴Mwenye chuki huficha chuki yake kwa maneno mazuri,

lakini huwa ana hila moyoni mwake.

²⁵Akiongea vizuri usimwamini,

moyoni mwake mna chuki chungu nzima.

²⁶Huenda akaficha chuki yake,

lakini nia zake mbaya zitajulikana kwa wote.

²⁷Amchimbiaye mwenzake shimo, hutumbukia mwenyewe;[#26:27 Huu ni msemo unaorudiwa pia katika vitabu vya hekima. Taz k.m. Zab 7:15-16; Mhub 10:8; Sira 27:25-27.]

abingirishaye jiwe litamrudia mwenyewe.

²⁸Asemaye uongo huwachukia hao anaowaumiza,

naye abembelezaye huleta maangamizi.