Wito wa Hekima

¹Sikilizeni! Hekima anaita!

Busara anapaza sauti yake!

²Juu penye mwinuko karibu na njia,

katika njia panda ndipo alipojiweka.

³Karibu na malango ya kuingilia mjini,[#8:1-3 Mafungu hayo ya maneno yanataja mahali ambapo katika mazingira ya kale ya mwandishi ndiko kulikokuwa na mkusanyo wa watu wengi. Kwa maneno hayo mwandishi bila shaka alitaka kusema kwamba mwito wa Hekima ni kwa watu wote. Neno “Busara” (aya 1b) ni neno lingine sambamba na hekima; maneno mengine yanayotumika mara nyingi kwa maana hiyohiyo ni: ujuzi, maarifa, akili, utambuzi, n.k.]

mahali wanapoingia watu anaita kwa sauti:

⁴“Enyi watu wote, nawaita nyinyi!

Wito wangu ni kwa ajili ya binadamu.

⁵Enyi wajinga, jifunzeni kuwa na akili;

sikilizeni kwa makini enyi wapumbavu.

⁶Sikilizeni maana nitakachosema ni jambo muhimu;

midomoni mwangu mtatoka mambo ya adili.

⁷Kinywa changu kitatamka kweli tupu;

uovu ni chukizo midomoni mwangu.

⁸Kinywa changu kitatamka maneno ya kweli,

udanganyifu ni haramu midomoni mwangu.

⁹Kwa mtu mwelewa kila kitu ni wazi,

kwa mwenye maarifa yote ni sawa.

¹⁰Chagua mafundisho yangu badala ya fedha;[#8:10 Kuwa na hekima ni bora kupita utajiri wote wa kidunia (taz pia 2:4; 3:14-15; 8:19; Yobu 28:15-19).]

na maarifa badala ya dhahabu safi.

¹¹“Mimi Hekima nina thamani kuliko johari;

chochote unachotamani hakiwezi kulingana nami.

¹²Mimi Hekima ninao ujuzi;

ninayo maarifa na busara.

¹³Kumcha Mwenyezi-Mungu ni kuchukia uovu.[#8:13 Taz 1:7 maelezo.]

Nachukia kiburi, majivuno na maisha mabaya;

nachukia na lugha mbaya.

¹⁴Nina uwezo wa kushauri na nina hekima.

Ninao ujuzi na nina nguvu.

¹⁵Kwa msaada wangu wafalme hutawala,[#8:15-16 Watawala ambao husikiliza hekima hutawala kwa haki na uaminifu. Mfalme au mtawala mwenye hekima ndiye aliyekuwa mtawala bora (Isa 9:6,7; 11:1-5). Wazo hili linakumbusha ombi la mfalme Solomoni apewe hekima (1Fal 3:6-9; 2Nya 1:8-10).]

watawala huamua yaliyo ya haki.

¹⁶Kwa msaada wangu viongozi hutawala,

wakuu na watawala halali.

¹⁷Nawapenda wale wanaonipenda;

wanaonitafuta kwa bidii hunipata.

¹⁸Utajiri na heshima viko kwangu,

mali ya kudumu na fanaka.

¹⁹Matunda yangu ni mazuri kuliko dhahabu safi,

faida yangu yashinda ile ya fedha bora.

²⁰Natembea katika njia ya uadilifu;

ninafuata njia za haki.

²¹Mimi huwatajirisha wanaonipenda,

huzijaza tele hazina zao wanipendao.

²²“Mwenyezi-Mungu aliniumba mwanzoni mwa kazi yake,

zama za zama kabla ya kuwako kitu chochote.

²³Nilifanywa mwanzoni mwa nyakati,

nilikuwako kabla ya dunia kuanza.

²⁴Nilizaliwa kabla ya vilindi vya bahari,

kabla ya chemchemi zibubujikazo maji.

²⁵Kabla ya milima haijaumbwa,

na vilima kusimamishwa mahali pake,

mimi nilikuwako tayari.

²⁶Kabla Mungu hajaumba dunia na mashamba yake,

wala chembe za kwanza za mavumbi ya dunia.

²⁷Nilikuwako wakati alipoziweka mbingu,

wakati alipopiga duara juu ya bahari;

²⁸wakati alipoimarisha mawingu mbinguni,

alipozifanya imara chemchemi za bahari;

²⁹wakati alipoiwekea bahari mpaka wake,

maji yake yasije yakavunja amri yake;

wakati alipoiweka misingi ya dunia.

³⁰Nilikuwa pamoja naye kama fundi stadi,[#8:30 Au, “kama mtoto mdogo”. Wengine wanafikiri “fundi stadi” ni kisifa cha Mungu na katika tafsiri wana: “Nilikuwa pamoja na yeye aliye fundi stadi”.]

nilikuwa furaha yake kila siku,

nikishangilia mbele yake daima,

³¹nikifurahia dunia na wakazi wake,

na kupendezwa kuwa pamoja na wanadamu.

³²“Sasa basi wanangu, nisikilizeni:

heri wale wanaofuata njia zangu.

³³Sikilizeni mafunzo mpate hekima,

wala msiyakatae.

³⁴Heri mtu anayenisikiliza,

anayekaa kila siku mlangoni pangu,

anayekesha karibu na milango yangu.

³⁵Anayenipata mimi amepata uhai,

amepata upendeleo kwa Mwenyezi-Mungu.

³⁶Asiyenipata anajidhuru mwenyewe;

wote wanaonichukia wanapenda kifo.”