Furaha ya mtu mwema

¹Msifuni Mwenyezi-Mungu!

Heri mtu anayemcha Mwenyezi-Mungu,

anayefurahia sana kutii amri zake.

²Wazawa wake watakuwa wenye nguvu nchini;

watoto wa wanyofu watapata baraka.

³Nyumbani kwake kutakuwa na mali nyingi;

uadilifu wake wadumu milele.

⁴Mtu mwema huangaziwa mwanga gizani;

mtu mwenye huruma, mpole na mwadilifu.

⁵Mtu mkarimu akopeshaye bila faida, hufanikiwa;

mtu afanyaye shughuli zake kwa kutumia haki.

⁶Mwadilifu hatashindwa kamwe,

huyo atakumbukwa milele.

⁷Hana haja ya kuogopa akipata habari mbaya;[#112:6-7 Haisemwi kwamba wenye kumtii Mungu hawatapata shida; watazipata lakini hazitawashinda kwa sababu tegemeo lao liko kwa Mungu (taz pia 37:39-40 maelezo).]

ana moyo thabiti na humtegemea Mwenyezi-Mungu.

⁸Yuko imara moyoni, wala hataogopa;

naye atawaona maadui zake wanashindwa.

⁹Hutoa kwa ukarimu, huwapa maskini;

uadilifu wake wadumu milele.

Nguvu yake inatukuzwa kwa heshima.

¹⁰Watu waovu huona hayo na kuudhika;

husaga meno kwa chuki na kutoweka,

matazamio ya mtu mbaya huishia patupu.