Mungu na watu wake

¹Watu wa Israeli walipotoka Misri,

wazawa wa Yakobo walipotoka ugenini,

²Yuda ikawa maskani ya Mungu,[#114:2 Au, “Yuda ikawa patakatifu pake”. Mungu alimteua Mose kuwatoa watu wake Misri, akawaongoza wakaingia katika nchi ya Kanaani. Baadaye, Mungu alichagua Yerusalemu, mji wa Yuda, kuwa makao yake; hivyo, kwa maneno mengine kabila la Yuda lilikuwa maskani yake Mungu.]

Israeli ikawa milki yake.

³Bahari iliona hayo ikakimbia;

mto Yordani ukaacha kutiririka!

⁴Milima ilirukaruka kama kondoo dume;

vilima vikaruka kama wanakondoo!

⁵Ee bahari, imekuwaje hata ukakimbia?

Nawe Yordani, kwa nini ukaacha kutiririka?

⁶Enyi milima, mbona mliruka kama kondoo dume?

Nanyi vilima, mmerukaje kama wanakondoo?

⁷Tetemeka, ee dunia mbele yake Mwenyezi-Mungu;

tetemeka mbele ya Mungu wa Yakobo,

⁸anayeugusa mwamba ukawa bwawa la maji,

nayo majabali yakawa chemchemi za maji!