Sifa za Yerusalemu

¹Nilifurahi waliponiambia:

“Twende nyumbani kwa Mwenyezi-Mungu.”

²Sasa tuko tumesimama,

kwenye malango yako, ee Yerusalemu!

³Yerusalemu, mji uliojengwa,

ili jumuiya ikutane humo.

⁴Humo ndimo makabila yanamofika,

naam, makabila ya Israeli,

kumshukuru Mwenyezi-Mungu kama alivyoagiza.

⁵Humo mmewekwa mahakama ya hukumu ya haki,

mahakama ya ukoo wa kifalme wa Daudi.

⁶Uombeeni Yerusalemu amani:

“Wote wakupendao na wafanikiwe!

⁷Ndani ya kuta zako kuwe na amani,

majumbani mwako kuweko usalama!”

⁸Kwa ajili ya jamaa na ndugu zangu,[#122:8 Hawa ni Waisraeli wenzi wa huyo Mwanazaburi ambao waliishi huko Yerusalemu.]

ee Yerusalemu, nakutakia amani!

⁹Kwa ajili ya nyumba ya Mwenyezi-Mungu, Mungu wetu,

ninakuombea upate fanaka!