Mungu mfalme na hakimu

¹Mwimbieni Mwenyezi-Mungu wimbo mpya![#96:1 Wimbo mpya unaimbwa kusherehekea matukio mapya, hapa huenda ni lile tukio la kuwarudisha Waisraeli kutoka uhamishoni Babuloni ambako walipelekwa mnamo mwaka 586 K.K.]

Mwimbieni Mwenyezi-Mungu, ulimwengu wote!

²Mwimbieni Mwenyezi-Mungu na kulisifu jina lake.

Tangazeni kila siku matendo yake ya wokovu.

³Yatangazieni mataifa utukufu wake,

waambieni watu wote matendo yake ya ajabu.

⁴Maana Mwenyezi-Mungu ni mkuu, anasifika sana;

anastahili kuheshimiwa kuliko miungu yote.

⁵Miungu ya mataifa mengine si kitu;[#96:5 Taz 31:6. Kuabudu miungu mingine kulikatazwa na sheria ya Mungu (Kut 20:4-6; Kumb 5:8-10).]

lakini Mwenyezi-Mungu aliziumba mbingu.

⁶Utukufu na fahari vyamzunguka;

nguvu na uzuri vyalijaza hekalu lake.

⁷Mpeni Mwenyezi-Mungu heshima, enyi jamii zote za watu;

naam, kirini utukufu na nguvu yake.

⁸Lisifuni jina lake tukufu;

leteni tambiko na kuingia hekaluni mwake.

⁹Mwabuduni Mwenyezi-Mungu katika patakatifu pake;[#96:9 Au, “kwa mavazi ya ibada”. Au, “anapotokea”. Aya 9 ni sawa na Zab 29:2b ambapo zingatia maelezo ya 29:1-2.]

tetemekeni mbele yake ee dunia yote!

¹⁰Yaambieni mataifa: “Mwenyezi-Mungu anatawala!

Ameuweka ulimwengu imara, hautatikisika.

Atawahukumu watu kwa haki!”

¹¹Furahini enyi mbingu na dunia!

Bahari na ivume pamoja na vyote vilivyomo!

¹²Furahini enyi mashamba na vyote vilivyomo!

Ndipo miti yote misituni itaimba kwa furaha,

¹³mbele ya Mwenyezi-Mungu anayekuja;

naam, anayekuja kuihukumu dunia.

Ataihukumu dunia kwa haki,

na mataifa kwa uaminifu wake.