¹Lakini watu wanyofu wako mikononi mwa Mungu,

Mateso yoyote hayatawapata kamwe.

²Kwa wapumbavu walionekana kwamba wamekufa

na kwamba kufariki kwao kulikuwa jambo baya;

³kuondoka kwao kwetu kulidhaniwa kuwa uharibifu,

lakini ukweli ni kwamba wamo katika amani.

⁴Waonavyo watu ni kwamba wameadhibiwa,

lakini wanalo tumaini thabiti la kutokufa.

⁵Waliadhibiwa kidogo tu,

lakini sasa watapokea tuzo kubwa;

Mungu aliwajaribu akawapata wanastahili kuishi kwake.

⁶Aliwajaribu kama dhahabu katika tanuri,

akawapokea kama tambiko ya kuteketezwa.

⁷Wakati wa kupata tuzo utakapofika, watang'aa,

watameremeta kama vimulimuli katika nyasi kavu.

⁸Watayahukumu na kuyatawala makabila na mataifa,

naye Bwana atatawala juu yao milele.

⁹Wote wamwaminio Mungu watatambua ukweli wake;

wote walio waaminifu watakaa kwake kwa upendo,

maana huwajalia neema na huruma watakatifu wake,

na huwaangalia kwa wema hao aliowateua.

¹⁰Lakini wabaya wataadhibiwa kadiri ya fikira zao mbovu,

naam, wasiojali mambo ya uadilifu,

wote waliomwasi Bwana.

¹¹Wote wanaodharau hekima au nidhamu wana bahati mbaya;

tumaini lao ni bure,

jasho lao haliwafaidii chochote;

na matendo yao ni ya bure.

¹²Wake zao huwa wapumbavu na watoto wao wapotovu;

wazawa wao watakuwa katika laana.

Umuhimu wa fadhila

¹³Heri mwanamke tasa ambaye hana hatia

ambaye hajahusika na muungano ulio dhambi;

huyo atapata tuzo Mungu atakapohukumu roho za watu.

¹⁴Heri pia towashi asiyevunja sheria kwa mikono yake,[#3:14 Yaani watu ambao wamehasiwa (kwa kawaida na watu wengine) walikuwa marufuku kujumuika na jumuiya na hasa katika huduma ya kikuhani (rejea Kumb 23:2; Lawi 21:20). Lakini Isaya (Isa 56:3b-5) anatangaza kwamba na hao pia watashiriki baraka za Mungu.]

ambaye hajafikiria maovu dhidi ya Bwana;

huyo atapata upendeleo maalumu kwa uaminifu wake,

na mahali pa furaha kuu katika hekalu la Bwana.

¹⁵Maana matunda ya kazi njema ni utukufu;

ni kama mizizi welekevu inayochipua daima.

¹⁶Lakini watoto wa wazinzi watakufa kabla ya kukomaa;

naam, wazawa wa wazinzi wataangamia.

¹⁷Na hata wakiishi sana hakuna atakayewajali,

na hatimaye uzee wao hautakuwa na heshima.

¹⁸Wakifa vijana hawatakuwa na tumaini,

wala hawatapata kitulizo wakati wa hukumu.

¹⁹Maana mwisho wa watu wasio waadilifu ni balaa tupu.