Kuweni tayari kwa siku ya Bwana

¹Basi ndugu, hatuna haja ya kuwaandikia kuhusu nyakati na majira,

²kwa kuwa mnajua vyema kwamba siku ya Bwana itakuja kama mwizi anavyokuja usiku.

³Watu wanaposema, “Kuna amani na salama,” maangamizi huwajia ghafula, kama vile uchungu unavyomjia mwanamke mwenye mimba; nao hakika hawatatoroka.

⁴Bali ninyi, ndugu, hampo gizani hata siku ile iwakute ghafula kama mwizi.

⁵Ninyi nyote ni wana wa nuru na wana wa mchana. Sisi si wana wa giza wala wa usiku.

⁶Kwa hiyo basi, tusilale kama watu wengine wanavyolala, bali tukeshe na kuwa na kiasi.

⁷Kwa kuwa wote wanaolala, hulala usiku, na wale wanaolewa, hulewa usiku.

⁸Lakini kwa kuwa sisi ni wana wa mchana, basi tuwe na kiasi, tukijivika imani na upendo kama dirii kifuani na tumaini letu la wokovu kama chapeo.

⁹Kwa maana Mungu hakutuita ili tupate ghadhabu bali tupate wokovu kupitia kwa Bwana wetu Yesu Kristo.

¹⁰Yeye alikufa kwa ajili yetu ili hata kama tuko macho au tumelala, tupate kuishi pamoja naye.

¹¹Kwa hiyo farijianeni na kujengana, kama vile mnavyofanya sasa.

Maagizo ya mwisho, na hitimisho

¹²Sasa tunawaomba, ndugu, waheshimuni wale wanaofanya kazi kwa bidii miongoni mwenu, wale ambao wana mamlaka juu yenu katika Bwana na ambao wanawaonya.

¹³Waheshimuni sana katika upendo kwa ajili ya kazi zao. Ishini kwa amani ninyi kwa ninyi.

¹⁴Nasi twawasihi, ndugu, waonyeni walio wavivu, watieni moyo waoga, wasaidieni wanyonge na kuwavumilia watu wote.

¹⁵Angalieni kuwa mtu asimlipe mwenzake maovu kwa maovu, bali siku zote tafuteni kutendeana mema ninyi kwa ninyi na kwa watu wote.

¹⁶Furahini siku zote;

¹⁷ombeni bila kukoma;

¹⁸shukuruni kwa kila jambo, kwa maana haya ndio mapenzi ya Mungu kwa ajili yenu katika Kristo Yesu.

¹⁹Msiuzime moto wa Roho Mtakatifu.

²⁰Msiyadharau maneno ya unabii.

²¹Jaribuni kila kitu. Yashikeni yaliyo mema.

²²Jiepusheni na uovu wa kila namna.

²³Mungu mwenyewe, Mungu wa amani, awatakase ninyi kabisa. Nanyi mhifadhiwe roho zenu, nafsi zenu na miili yenu, bila kuwa na lawama katika Bwana wetu Yesu Kristo.

²⁴Yeye aliyewaita ni mwaminifu naye atafanya hayo.

²⁵Ndugu, tuombeeni.

²⁶Wasalimuni ndugu wote kwa busu takatifu.

²⁷Ninawaagiza mbele za Bwana mhakikishe kuwa ndugu wote wanasomewa barua hii.

²⁸Neema ya Bwana wetu Yesu Kristo iwe nanyi. Amen.